“Бунёдкор” футбол клуби ўз таркибига қўшиб олган янги футболчиларни кенг оммага расман таништиради. Бу ҳақда клуб расмий сайти хабар тарқатмоқда.

3 март, шанба куни “Жар” стадионида соат 14:00да бошланадиган ушбу маросим икки қисмдан иборат бўлади. Дастлабки қисмда оммавий ахборот воситалари ходимлари “қалдирғочлар”нинг янги аъзоларига айланишган футболчилар билан мулоқот қилиш имкониятига эга бўладилар. Шунингдек, тадбирнинг бу қисмида клуб раҳбарияти томонидан “Бунёдкор”нинг янги футболчиларига улар учун аталган футболкалар ҳам тантанали равишда топширилади.

Шундан сўнг “Жар” стадиони майдонида жамоанинг янги аъзолари мухлислар қаршисига чиқиб келишади ва улар учун ўз техникалари, тўп билан муомала қилиш санъатини намойиш этиб беришади. “Бунёдкор” учун бефарқ бўлмаган футбол ишқибозлари тадбирнинг иккинчи қисмига таклиф этиладилар.

Соат 16:00да эса “Жар” майдонида “Бунёдкор” аъзолари икки таркибга бўлинишган ҳолда ўзаро баҳс олиб боришади. Бу ўйинни ҳам ишқибозлар ва журналистлар бевосита кузатиб бориш имкониятига эга бўладилар.

"Бунёдкор" ФК оммавий ахборот воситаларининг турли йўналишларида ижод қилаётган журналистларни ушбу маросимларга таклиф этади.