24-октябрь куни словениялик дарвозабон Ян Облак Испания чемпионатининг 10-туридан ўрин олган “Реал Сосьедад”га қарши ўйинда “Атлетико”нинг асосий таркибида майдонга тушди. Бу словениялик учун "матрасчилар" сафидаги барча турнирлардаги 315-ўйин бўлди, деб хабар беради Sport.es портали.
Маълумотларга кўра, Облак ўтказилган ўйинлар сони бўйича "Атлетико" тарихидаги учинчи хорижлик футболчига айланиб олди. Бу кўрсаткич бўйича, дарвозабон колумбиялик ҳимоячи Луис Переани (314 ўйин) ортда қолдирди.
Мадрид клуби сафида Облак фақатгина 333та ўйинда майдонга тушган бразилиялик Филипе Луис ва 389та "Атлетико" либосида ўйин ўтказган уругвайлик Диего Годиндан ортда қолмоқда.
Облак Мадрид клуби сафида 315та ўйин ўтказиб, 224та гол ўтказиб юборган ва 163 марта ўз дарвозаси даҳлсизлигини таъминлаган.
Футболчи 2014-йилдан буён “матрасчилар” сафида тўп сурмоқда, у Лиссабоннинг “Бенфика” клубидан 16 миллион евро эвазига кўчиб ўтган эди. Словениялик дарвозабоннинг клуб билан амалдаги шартномаси 2023-йилнинг июнигача амал қилади.
