Сербияда бокс бўйича жаҳон чемпионатида дастлабки сенсация юз берди. 71 кг. вазнда иштирок этаётган кубалик Роньель Иглесиас Белграддаги мусобақани илк жангдан кейиноқ тарк этди.

33 ёшли боксчи турнирнинг 1/32 финал босқичи доирасида иорданиялик Зиёд Яшашга қарши рингга кўтарилди. Осиёлик спортчи илк сониялардан тажовузкор жанг қила бошлади ва рақибига кўплаб зарбалар берди. Дастлабки дақиқа ортда қолган вазиятда Иглесиаснинг қоши ёрилди ва қон тўхтамади. Натижада мусобақа шифокори жангни тўхтатишга қарор қилди. Бир дақиқалик жанг ҳисоб-китоблари бўйича ҳакамлар ғалабани Зиёд Яшашга тақдим этишди.

Эслатиб ўтамиз, Иглесиас икки карра олимпиада чемпиони (2012 ва 2020) ҳисобланади. У 2009 йилда жаҳон чемпионлигини қўлга киритган. Шунингдек, кубалик боксчи ҳисобида Пекин-2008 олимпиадаси бронза медали ва Гамбург-2017 ЖЧ кумуш медали (финалда Шаҳрам Ғиёсовга ютқазган) ҳам бор.

Ушбу вазнда ғолибликка даъвогар сифатида Роньел Иглесиас ва Шаҳрам Ғиёсов тилга олинаётган эди. Қуръага кўра, улар фақат финалда учрашишлари мумкин эди.