Муҳаммад Салоҳ 2017 йилда “Ливерпуль” аъзосига айланади. Ўшанда клуб мухлисларининг ҳеч бири ҳали мисрлик ҳужумчининг нималарга қодир эканлигини билмас эди. “Рома”даги фаолияти билан танила бошлаган футболчининг ўзи ҳам, Англияга қайтиб, ҳақиқий юлдузга айланишини ҳатто тасаввур ҳам қилмаган бўлса керак. Бугунги кунга келиб, Салоҳ дунёдаги исталган ҳужумчи ҳавас қилиши мумкин бўлган натижалар қайд этмоқда. У айнан “Ливерпуль” футболчиси сифатида бир-биридан ажойиб ва ҳайратланарли статистикага эриша олди. Қуйида Салоҳнинг энг яхши натижаларининг айримларига назар ташлаймиз.
АПЛ тарихида бир мавсумда 30та ва ундан кўп гол урган биринчи Африка қитъаси вакили
Англия футболи тарихида кўплаб фантастик ўйин кўрсатган африкалик футболчилар бор. Бунга мисол қилиб, Дидье Дрогба, Нванку Кану, Яҳё Туре, Якубуни келтиришимиз мумкин. Ушбу рўйхат яна узоқ давом этади. Уларнинг ҳаммаси Англиядаги фаолияти чоғида ҳайратланарли натижаларга эришган. Бироқ ҳеч бири Салоҳнинг 2017-2018 йилги мавсумда қайд этган 30талик довонидан оша олмаган. Муҳаммад эса нафақат бу натижага эришган, балки иккита голга ўзиб ҳам кетганди.
“Ливерпуль” тарихида учта мавсумда кетма-кет 20тадан кўп гол урган илк ўйинчи
Мерсисайдликлар тарихида Салоҳгача ҳали ҳеч бир футболчи уч марта қаторасига 20 тадан кўпроқ гол билан мавсумни якунламаган эди. Миср терма жамоаси аъзоси эса 2020-2021 йилги мавсум якунида буни уддалайди. Ҳатто у, бу натижага бир йил илгари ҳам эришиши мумкин эди, аммо Муҳаммад “Ливерпуль”даги дастлабки йилида 19 та гол билан мавсумни якунлашга мажбур бўлган.
АПЛнинг бир мавсумида энг кўп гол урган футболчи (32)
Бу борада инглиз футболи тарихида Луис Суарес (2013-2014), Криштиану Роналду (2007-2008) ҳамда Алан Ширер (1995-1996) етакчилик қилаётган эди. Уларнинг ҳаммасида бир мавсумда 31 тадан гол мавжуд бўлган. Муҳаммад ушбу трионинг рекордини бутунлай бузиб ташлади: у 2017-2018 йилги мавсумда 32та гол уришга муваффақ бўлди. Бунда яна бир жиҳатга эътибор қаратиш керак: Салоҳ 32 та гол урган мавсумида 24 та баҳсда рақиблар дарвозасига йӯл топа олганди. Бу эса ўзига хос яна бир рекорд саналади.
Аслини олганда, бу борада Ширер ва Энди Коулда яхшироқ натижа қайд этилган. Улар узоқ ўтмишда бир мавсумда 34 тагача гол ура олишган. Бироқ у пайтларда мавсум 38 та турдан эмас, балки 42 турдан иборат бўларди. Салоҳда яна тўртта кўп ўйин ўтказиш имкони бўлганида, шубҳасиз, голлари сони 32 тадан ошарди. Лекин, барибир 38 талик тизимда мутлақ рекордчи Салоҳдир.
Англияда Криштиану Роналдуни ортда қолдира олган футболчи
Роналду бир пайтлар “МЮ”ни дунёдаги энг яхши футболчилар қаторида тарк этган. У Англиядаги олтита мавсуми давомида жами 118 та голга муаллифлик қилади. Салоҳ эса бу натижага эришиш учун тўрт мавсум сарфлаган, холос. Мос равишда камроқ ўйинда ҳам иштирок этган. Ушбу икки футболчини солиштириш учун фақатгина АПЛдаги голларини ҳисобга олсак, “Олд Траффорд”даги илк даврида Роналду учун 84 та гол уришга 196 та учрашув керак бўлган. Салоҳ эса бу кўрсаткичга 133 та АПЛ баҳсида эришди. Ҳатто у Роналдудан битта голга ошиб ҳам кетди (133/85).
“Ливерпуль” тарихидаги АПЛнинг дастлабки 100та учрашувида энг кўп гол муаллифи
Муҳаммад Салоҳ “Ливерпуль” сафида АПЛ доирасида ўзининг 100-юбилей ўйинини 2020 йилнинг март ойида ўтказган эди. У ўшанда мерсисайдликлар тарихидаги 70-голини дарвозага йўллай олган. У бу орқали аввалги энг яхши натижа муаллифи бўлган Фернандо Торресни бутунлай ортда қолдириб кетади. Торрес бу борада 63 та голга эгалик қиларди.
Англия футболи тарихида бундан ҳам яхшироқ натижа кўрсатганлар мавжуд. Бироқ улар бу ишни турнир Премьер-лига деб аталишидан илгари бажарган. Улардан бири “Ливерпуль”нинг афсонавий ҳужумчиси Рожер Хантдир. У Лиганинг 100та баҳсида 72 марта рақиб дарвозасини ишғол эта олган. Янги тарихда эса барибир Салоҳ тенгсиздир.
ЕЧЛ ярим финалида 2 та гол ва 2 та узатма ижро этган тарихдаги икки футболчидан бири
Кўпинча мухлислар Салоҳни катта-катта баҳсларда майдонда кўринмай қолишда айблашади. Аммо амалда ҳам шундаймикин? Ҳар ҳолда, у ЕЧЛ ярим финалида 2та гол ва 2та ассист ҳосил қила олган тарихдаги иккита футболчининг бири саналади. Муҳаммад буни 2018 йилнинг апрель ойида, “Рома” қарши 5:2 ҳисобидаги ғалабали ўйинда ижро этган. Ўшанда итальянлар атиги 60 дақиқа ичида таслим этилган ва майдонни йиғлаб тарк этишган эди.
“Ливерпуль”нинг барча даврлардаги энг яхши Чемпионлар лигаси тўпурари
Мисрлик футболчи 2017 йилда, атиги бундан тўрт йил олдин жамоага келган бўлса ҳам, аллақачон клубнинг ЕЧЛдаги энг яхши ҳужумчисига айлана олди. Салоҳ яқиндагина “Атлетико Мадрид”га қарши баҳсда ўзининг 31-голини киритди ва бу борадаги натижасини янада яхшилаб олди. Ушбу гол Муҳаммаднинг Жеррарддан ўтиб кетишига имкон берди. Унга еврокубокларда 31та гол уриш учун атиги 48 та ўйин керак бўлди, холос. Бу Стивенникидан 39 тага камроқ дегани (Стивен Жеррард 87та баҳсда 30та гол ура олган).
АПЛ тарихида 100 голга энг тез эришган “Ливерпуль” ҳужумчиси
Мавсумнинг “Брентфорд”га қарши баҳсида Муҳаммад Салоҳ АПЛда “Ливерпуль” учун ўзининг 100-голига муаллифлик қилади. У бу орқали аввалги клуб рекордчиси Рожер Хантдан ўтиб кета олди. Салоҳ 100талик довонга етиш учун 151та учрашув сарфлаган. Тарихда фақат учтагина футболчи 100 гол уриш учун Салоҳдан камроқ ўйин сарфлаган. Булар: Алан Ширер (124), Харри Кейн (141) ҳамда Серхио Агуэро (147).
АПЛ тарихида энг кўп гол урган африкалик футболчи
Шу кунгача Англия миллий чемпионатидаги энг яхши натижага эга африкалик ҳужумчи Дидье Дрогба эди. Аммо яқинда, Муҳаммад ундан ўзиб кетишга муваффақ бўлди. АПЛнинг 9-туридан ўрин олган “Манчестер Юнайтед” ва “Ливерпуль” ўртасидаги баҳсда қайд этилган 0:5 ҳисобидаги натижадан ҳамманинг хабари бор. Салоҳнинг ушбу ўйинда қайд этган хет-триги эса Дрогбанинг 104та голлик рекордини янгилади. Эндиликда Салоҳ ҳисобида 107 гол мавжуд ва у бу борада Африка қитъасининг ҳақиқий фахрига айланди. Унинг жамоадоши Садио Манеда ҳам натижалар ёмон эмас. Шундай экан, бундан буён икки жамоадошнинг голлар борасидаги курашини кўрсак ажаб эмас.
Жалолиддин ИСМАТОВ тайёрлади
