Ўзбекистон миллий жамоаси бугун — 15 ноябрь куни Гори шаҳрида Грузияга қарши ўртоқлик учрашувини ўтказади. Грузинлар бош мураббийи Вилли Саньоль учрашувдан олдин матбуот анжуманида иштирок этиб, ўз фикрлари билан ўртоқлашди.

"Шубҳасиз, йилни кетма-кет учинчи ғалаба билан якунлашни истаймиз. Терма жамоа яна бир марта кучли руҳият ва тартиб-интизом намойиш этишини истардим. Ўзбекистонга қарши ўйиндан кейин 4 ой давомида биз йиғилмаймиз. Шу боис, эртанги ўйинда ижобий натижа қайд этишимиз керак", — деди Саньоль.

Франциялик мутахассис, шунингдек, ЖЧ-2022 саралаш босқичидан ўрин олган Швецияга қарши баҳсда қозонилган ғалаба хусусида ҳам тўхталиб ўтди.

"Швецияга қарши ўйиндаги ғалабамизга жамоанинг якдиллиги ҳал қилувчи омил бўлди. Йигитларнинг ҳимояда ва ҳужумда кўрсатган ўйинидан қониқиш ҳосил қилдим. Барча йигитлар чизиқларда жуда яхши ҳаракат қилишди. Ўйлашимча, Швеция учун бу сюрприз бўлди. Албатта, учрашув идеал даражада бўлмади, аммо ўйин ва натижадан тўла қониқиш ҳосил қилдим", - деди Саньоль.