O‘zbekiston milliy jamoasi bugun — 15 noyabr kuni Gori shahrida Gruziyaga qarshi o‘rtoqlik uchrashuvini o‘tkazadi. Gruzinlar bosh murabbiyi Villi Sanyol uchrashuvdan oldin matbuot anjumanida ishtirok etib, o‘z fikrlari bilan o‘rtoqlashdi.

"Shubhasiz, yilni ketma-ket uchinchi g‘alaba bilan yakunlashni istaymiz. Terma jamoa yana bir marta kuchli ruhiyat va tartib-intizom namoyish etishini istardim. O‘zbekistonga qarshi o‘yindan keyin 4 oy davomida biz yig‘ilmaymiz. Shu bois, ertangi o‘yinda ijobiy natija qayd etishimiz kerak", — dedi Sanyol.

Fransiyalik mutaxassis, shuningdek, JCH-2022 saralash bosqichidan o‘rin olgan Shvesiyaga qarshi bahsda qozonilgan g‘alaba xususida ham to‘xtalib o‘tdi.

"Shvesiyaga qarshi o‘yindagi g‘alabamizga jamoaning yakdilligi hal qiluvchi omil bo‘ldi. Yigitlarning himoyada va hujumda ko‘rsatgan o‘yinidan qoniqish hosil qildim. Barcha yigitlar chiziqlarda juda yaxshi harakat qilishdi. O‘ylashimcha, Shvesiya uchun bu syurpriz bo‘ldi. Albatta, uchrashuv ideal darajada bo‘lmadi, ammo o‘yin va natijadan to‘la qoniqish hosil qildim", - dedi Sanyol.