11 март куни ўтказилиши керак бўлган Ўзбекистон Суперкубоги ўйини кейинроқ муддатга қолдирилди.

11 март куни Тошкентдаги «Жар» стадиони Ўзбекистон Суперкубоги беллашувига мезбонлик қилиши белгилаб қўйилганди. Унда Ўзбекистон чемпиони «Бунёдкор» амалдаги Кубок эгаси «Пахтакор»га қарши майдонга тушиши лозим эди. Бироқ ноқулай об-ҳаво шароити ва «Жар» стадиони майсасининг аҳволи инобатга олиниб, Ўзбекистон Суперкубоги кейинроқ муддатга қолдирилди.

6 март куни «Бунёдкор» «Жар» стадионида Австралиянинг «Аделаида Юнайтед» клубига қарши ўйин билан Осиё чемпионлар лигаси гуруҳ босқичини бошлаб берди. 14 март куни эса Ўзбекистон олимпия терма жамоаси «Жар»да БАА олимпия терма жамоасига қарши ўйинда майдонга тушади. ОЧЛ ўйинидан кейин стадион майсаси Ўзбекистон олимпия терма жамоасининг муҳим учрашувига қадар тайёр ҳолда бўлиши кераклигини инобатга олган ҳолда ЎФФ мутасаддилари Суперкубок учрашувини бошқа муддатга қолдиришга қарор қилишди. ЎФФ президенти Мираброр Усмонов, ташкилот вице-президенти Сардор Раҳматуллаев, терма жамоалар маркази директори Асқар Толибжонов, ЎзПФЛ бош директори Фарҳод Магомедов, ЎФФ матбуот бўлими бошлиғи Санжар Ризаев иштирок этган кичик йиғилишда терма жамоа манфаатлари инобатга олиниб, шундай қарорга келинди.

«Бунёдкор»нинг «Аделаида Юнайтед» клубига қарши ўйинидан кейин «Жар» майдони парваришга муҳтож бўлиб қолди. Майдон майсасининг тикланиши учун эса вақт керак. Келаётган ҳафта ёғингарчиликнинг мўл бўлиши муносабати билан 11 мартга режалаштирилган Суперкубок учрашувини ўтказишдан кўра «Жар» стадионини 14 март кунги БАА олимпия терма жамоасига қарши муҳим ўйинга асраш афзалроқ бўлгани учун шундай қарор қабул қилинди.