Сэм Морган атиги 20 ёшда. У 7 ёшидаёқ мустақил пул ишлашни бошлаган. Ҳозирда АПЛнинг энг сара юлдузлари шу йигитнинг мижозлари саналишади - Жек Грилиш ва Поль Погбадан тортиб, Кевин де Брюйне ва Гарри Кейнгача... Аксарият тенгдошлари ўқиш баробарида кечқурун бир чақа учун ишлаётган паллада Сэм АПЛ футболчиларига буюртма асосида либос етказиб бермоқда. Энди корчалон йигитчада шахсий бизнеси бор. Хусусан, «Инстаграм» тармоғидаги SM Creps бренди аккаунти обуначилари сони аллақачон 130 мингдан ошди. Сэм Морган шунингдек, Британия телевидениесида ўз шоусини йўлга қўйган.
7 ёшидан пул топишга ўтган
Ҳа, Сэм 7 ёшидаёқ мустақил равишда пул ишлаган, 15 ёшида эса реселлер (қайта сотиш иши) билан шуғуллана бошлаган. Оддий айтганда, болалигидан бизнесга мойил. «Ҳар доим ниманидир сотишни қойиллатганман. Дейлик, 7 ёшда мактабдан уйга 4 фунт стерлинг фойда билан қайтганман. Ҳозир ҳам шундай, фақат барчаси каттароқ кўламда», - дейди Сэм. У 11 ёшида атиги 10 дақиқада 15 фунт ишлаб топади. Ўшанда дўстларидан бири АҚШдан турли ширинликлар олиб келиб, мактабда пуллай бошлаган ва Сэм улардан ярмини сотиб берган, албатта, тушумнинг маълум фоизини ўзига олиб қолиш эвазига. Болакай 13 ёшга тўлгач, ўзини мода соҳасига уради: дизайнерлик буюмлари савдосига қўшилади. Шу тариқа Сэм 15 ёшида биринчи йирик даромадини ҳисоблайди - 3000 фунт стерлинг. «Ишни Ebay, Depop ва «Фейсбук»да пойафзал сотишдан бошладим, - дейди Морган. — Айни пайт Америка, Франция, Италия, Германия, Польша ва Европанинг бошқа мамлакатларида шу йўналишда фаолият юритувчи нуфузли шахсларни биламан. У ёки бу мамлакатда қандай янги маҳсулот чиқишини кузатиб бораман, шунинг эвазига доимо тезкор ишлайман».
Иқтисодиёт, математика ва психология
Морган мактабда иқтисод, математика ва психология фанларини чуқур ўрганган - булар музокара жараёни, маҳсулот харид қилиш ва сотишда ёрдам беради. Ҳозир Европада ноёб либослар олди-сотди бозори жадал ривожланмоқда. Thred Up маълумотларига кўра, 2018 йили қайта сотишнинг умумий ҳажми 20 миллиард долларни ташкил этганди. Тахминларга кўра, 2022 йили бу сумма 41 миллиард долларга кўтарилади. 15 фоиз йиллик ўсиш - бунга ақл бовар қилмайди. Зеро, чакана савдо йўналишидаги умумий ўсиш атиги 2 фоизга тенг.
Рамос ҳам ошуфта
Сэм Морганнинг ишига Серхио Рамос ҳам бефарқ эмас. Умуман, йигитча футболчилар билан яқиндан ҳамкорликни йўлга қўйган. Бунда унга «Арсенал» футболчиси ва Fortnite онлайн ўйини ёрдам берган. Ёш сотувчи бир йил ичида мислсиз даражада кўтарилди: «Бир куни тўшакда ётиб, эндигина «Арсенал» ёшлар жамоаси сафига қўшилган Кохен Брамаллга хат ёздим. Чунки унинг бренд маҳсулотларга қизиқишини кўрдим. 4 кундан кейин учрашдик ва Кохен Yeezy кроссовкасини сотиб олди. Кейинги ҳафта эса Крис Уиллок боғланиб, менда нималар борлиги билан қизиқди. Шу аснода «Арсенал»нинг деярли барча ёшлари мижозимга айланишди». Кейин Лондоннинг бошқа клубларидаги ёшлар - Деклан Райс, Тэмми Абрахам ва Рис Жеймс ҳам Сэм билан алоқага чиқишди. Морганнинг навбатдаги даромади кутилмаганда келди: у машҳур Fortnite онлайн ўйинига кирди ва Деле Алли, Кевин де Брюйне ҳамда Поль Погба билан танишди. Fortnite - футболчилар орасида жуда оммалашган ўйин. Дейлик, Златан Ибрагимович, Неймар ва бошқа юлдузлар ҳам шу ўйин шайдоларидир. Илова яратувчилари мухлисларни турли бонуслар билан жалб қилишади. Масалан, 2021 йилнинг апрель ойида Неймар иштирокида ўзига хос турнир ташкиллаштирилди. «Fortnite ўйинига қўшилиб, аввалига Алли билан танишдим, кейин де Брюйне билан йўлларимиз кесишди. Эътиборли томони, у ўйин давомидаёқ мен ҳақимда эшитганини айтиб, бир жуфт кроссовкага буюртма берди», - дея эслайди Сэм Морган.
Хуллас, йигитнинг иши футболчилар орасида тезда овоза бўлди. Эндиликда Бенжамин Менди, Жек Грилиш, Поль Погба, Росс Баркли, Антонио Рюдигер, Сон Хюн Мин, Трент Александр-Арнольд, Гранит Жака, Александр Лаказетт, Пьер-Эмерик Обамеянг ва Месут Озил каби юлдузлар Морганнинг доимий мижозларига айланишди. Спортчилар одатда Сэмга машҳур рэпперлар суратларини юбориб, уларнинг кийим ёки пойафзалларини сотиб олишни сўрашади. Айтишича, Лионель Месси, Неймар, Эрлинг Холанд каби футболчилар у билан бир неча марта боғланишган. Сэмнинг асосий ютуғи - футболчиларга айтилган либосни яшин тезлигида арзон баҳода етказиб беради: «Ҳамма қатори футболчилар ҳам сифатли нарсаларни иложи борича арзон баҳода сотиб олишни хоҳлашади. Асл нархи 1,2 минг фунтга тенг оёқ кийимини анча арзонга олишим мумкин, чунки савдогарлар билан алоқам бор. Яна бир томони, мижозларимни ҳеч қачон алдамайман. Бу ҳурмат қозониш учун жуда муҳим».Сэм кўплаб футболчилар билан дўст тутинган: «Юлдузлар ўзгаларни шахсий ҳаётларига яқинлаштиришни хоҳламасликларини яхши биламан. Шунинг учун ҳам уларнинг менга ишонишлари, тавсия этилган либосни иккиланишсиз сотиб олишларидан бахтиёрман. Баъзи футболчиларни жуда яхши биламан ва ўртамизда дўстлик ҳам шаклланган. Дейлик, «Арсенал» аъзоларидан бири мени туғилган куни тантанасига таклиф қилганди».
Погба — бош мижоз
Поль Погба ҳақида сўз борганида, аввало, унинг сиймоси кўз олдимизга келади: ўзига хос соч турмаги, ёрқин ва қимматбаҳо уст-бош, ноёб оёқ кийими. Демак, Сэмнинг айнан Поль билан кўпроқ ҳамкорлик қилишида ажабланарли томони йўқ. Франциялик футболчига капсулли кроссовкалар, Gucci либослари ва нодир аксессуарларни айнан Морган етказиб беради. Погбанинг баъзи буюртмаларини мисол тариқасида келтириш мумкин: машҳур корейс бренди - 99 % IS шими (1 минг фунт), Rhude футболкаси (400 фунт), Armani курткаси ва жинсиси (тегишлича 2 ва 1 минг фунт), Dior B22 кроссовкаси (980 фунт). Буларнинг жами суммаси - 5,3 минг фунт. Франциялик футболчи чиндан ҳам, камёб маҳсулотларга қаттиқ қизиқади. Сэмга The Plug (оддий йўл билан топиб бўлмайдиган ноёб ва қимматли нарсаларни етказиб берадиган шахс) лақабини айнан Погба берган. Айтиш ўринли, бу Морганга муносиб таъриф. Франциялик ярим ҳимоячи реселлер (қайта сотувчи) билан шу қадар иноққи, уни ЖЧ-2018дан сўнг Парижга таклиф қилган ва Франция миллий жамоаси ғалабаси шарафига уюштирилган тантаналарда 2 кун ўзи билан бирга олиб юрган. Қолаверса, Морган бунга қадар Самуэль Юмтити, Антуан Гризманн ва бошқа футболчилар билан алоқа ўрнатишга улгурганди.
Нега айнан футболчилар?
Ҳаммаси оддий: АПЛда ҳафталик ўртача маош миқдори 50 минг фунтдан кўп. Қисқаси, юқори даромад ва модага қизиқишни инобатга олсак, футболчилар - Сэм Морган учун идеал мижозлар. Ўйинчилар асосан обрўли брендларни танлашади - Amiri, Balenciaga, Saint Laurent, Off-White, Givenchy, Gucci, Louis Vuitton, Alexander McQueen, Palm Angels, Supreme ва Heron Preston. Сэм эса бу йўналишдаги муваффақиятини оддий изоҳлайди: «Ёшман ва кўп ишлайман. Юлдузларга хоҳлаган вақтда буюртма қабул қилишим ва ҳаммасини қисқа муддатда етказиб беришим маъқул». Оддий мисол, Пьер-Эмерик Обамеянг самолётга ўтиришидан атиги 2 соат олдин Сэмдан зудлик билан PS4 учун қувватлантириш қурилмаси етказиб беришини сўраган. Погба эса Моргандан муҳим реклама фотосессияси арафасида саҳна ҳозирлаб беришини илтимос қилган. Шунингдек, Натаниэль Чалоба ундан 2015 йилги коллекцияга мансуб Louis Vuitton сумкаси топиб беришини сўраган. Муҳими, Сэм барча буюртмаларни вақтида етказиши билан футболчилар ҳурматини қозонган. Дарвоқе, Морган болалигида «Арсенал» ўйини шайдоси бўлган: «Ҳа, «канонирлар»нинг ашаддий мухлиси эдим, бироқ ҳозир жамоани унча кузатолмаяпман. Эндиликда муайян бир клуб эмас, барча мижозларимга мухлисман».
Сэм ўз даромади ҳақидаги саволларни ёқтирмайди, аммо «мислсиз даражада катта» топишини яширмайди. «Инстаграм»даги саҳифаси ва юлдуз мижозларига қараганда, чиндан ҳам, шундай. Қолаверса, Морган ўз бизнесини кенгайтиришни режалаштирмоқда. У ҳозирда ота-онасига тегишли уйдан туриб, онлайн-тизимда ишламоқда. Ҳозирча отаси - бош кўмакчиси. Сэм энди бирор бинони ижара асосида олиб, 2-3 нафар ишчи ёллашни ўйламоқда. Тиниб-тинчиман йигит шу ишларга параллель равишда хусусий коллежда бизнес ва психология йўналишида ўқимоқда. Қойил!
МУҲАММАДСОДИҚ тайёрлади
