«Манчестер Юнайтед» клуби ва Португалия терма жамоаси собиқ ярим ҳимоячиси Луиш Нани АҚШнинг «Орландо Сити» жамоасини тарк этаётганини эълон қилди.

«Барча яхши нарсалар қачондир тугайди. Гўзал лаҳзаларга тўла учта ажойиб мавсумлар, янги  танишувлар ва муваффақиятлардан сўнг мен «Орландо Сити»ни тарк этяпман.

Орландо — мен бу шаҳарни ўз уйим дея айта оламан. Унинг инсонлари ажойиб, ишқибозлари фантастик, аммо менинг клуб билан шартномам якунига етди. Клуб уни узайтирмасликка қарор қилди. Клуб ўз тарихида илк марта MLS плей-офф босқичида иштирок этганида жамоа сардори бўлиш мен учун шарафли бўлди.

Мухлислар мени ва оиламни илк кунданоқ қай тарзда қўллаб-қувватлашганини ҳеч қачон унутмайман. Сиз ўзингизга мен каби дўст ва мухлисни орттирдингиз. Сизларга энг яхши тилакларимни билдираман», — дея ёзди Нани твиттер орқали.

35 ёшли футболчи 2019 йилдан буён «Орландо Сити» сафида тўп тепиб келаётганди. Нани «Манчестер Юнайтед»дан ташқари «Спортинг», «Фенербахче», «Валенсия» ва «Лацио» клубларида ўйнаган.