Аргентина терма жамоасининг ҳужумкор яримҳимоячиси Анхель ди Мария фаолиятини Испания чемпионатида давом эттириши мумкин. “Don Balon” нашри хабарига кўра, “Севилья” вингер хизматларига қизиқиш билдирмоқда. Андалусияликлар январдаги трансфер ойнасида келишувга эришмоқчи.
Эслатиб ўтамиз, 33 ёшли футболчи Франциянинг ПСЖ клубига тегишли. Томонлар ўртасидаги шартнома муддати 2021/2022 йилги мавсум охирида тугайди.
Ди Мария Ла Лигада ўйнаш тажрибасига эга. Аргентиналик футболчи тўрт мавсум давомида “Реал Мадрид” шарафини ҳимоя қилди.
Анхель Франция чемпионати жорий мавсумида 11 учрашувда 3 та гол урди ва 3 та голли узатмани амалга оширди.
