“Динамо”- “Насаф” (0:2) учрашувида биринчи голни киритиш жамоамизнинг тажрибали футболчиси Жаҳонгир Жиямуродовга насиб этди. У пеналтидан рақиб дарвозасини ишғол этиш билан бирга нафақат “Насаф”нинг, балки янги мавсумнинг илк голига ҳам муаллифлик қилди. Ўйиндан кейин Жиямуродов клуб веб-сайти учун учрашув ҳақидаги фикрларини билдириб ўтди.
- Ўйлайманки, стадионни тўлдириб турган мухлислар бугун зерикиб қолишмади. “Динамо” жамоаси ҳам мавсумга яхши тайёргарлик кўрганини намойиш этди ва кутилгандек бизга жиддий қаршилик кўрсатди, - дейди Жиямуродов. – Энг муҳими бизни қўллаб-қувватлаш учун ташриф буюрган қаршилик мухлисларга қувонч улаша олдик. Олдимизда яна жиддий сафар учрашуви кутиб турибди. Эронда “Истиқлол”га қарши ўйин осон бўлмаслиги аниқ. Ушбу ўйиндаги ғалаба ўз кучимизга бўлган ишончни қайтара олди. Насиб этса кейинги учрашувда ҳам юртимиз шарафини муносиб ҳимоя қилишга ҳаракат қиламиз.