“Бунёдкор”дан енгилган “Похан Стилерз” устози Хван Сун-Хон ўйиндан кейинги матбуот анжуманида рақиб ҳимоя чизиғини мақтади.
- Биз ҳужумкор ўйин кўрсатдик. Аммо омадимиз чопмади. Аввало, қатор ҳужумларимизни рақибнинг ишончли ҳаракат қилган ҳимояси қайтара олган бўлса, иккинчи тарафдан, бизнинг дарвозамиз томон уюштирилган иккита қарши ҳужум натижасида тўп ўтказиб юбордик.
- Асосан ҳужумларни қанотдан ташкил этишни ихтиёр қилишдан мақсад нима эди?
- Биз марказдан ҳам олдинга ўтиб турдик. Шу билан бирга, иккала қанот ҳам ишлади. Ютқазаётганимиз учун, кейинчалик ярим ҳимоячиларни ҳужумчиларга алмаштирдим. Мен кеча айтгандим, “Бунёдкор”нинг марказий ярим ҳимояси кучли деб. Лекин менинг шогирдларим қанотларга кетиб қолаверишди. Бунинг оқибатида, марказни рақибга бериб қўйдик.
- Икки учрашувдан бери иккитадан гол ўтказаяпсизлар. Бунга нима сабаб?
- “Пусан И’Парк” билан атиги 3 кун олдин тўп сургандик. Йигитларим чарчоқ аломатларини енгиша олмаган кўринади. Боз устига, гол қўйиб юборгач, улар бугун, ҳимояни очиқ қолдириб, олдинга ташланишга мажбур бўлишди.
- Шунча ҳужумларни самарали якунлашга шогирдларингиз нега қийналишди?
- “Бунёдкор” асли яхши жамоа. Шунга ҳам уролмадик, шекилли. Бу футбол. Ўтган сафар ютдик, бу гал муваффақиятсизликка учрадик. Кейинги ўйинларда яна ютуқ учун ҳаракат қиламиз.