“Бунёдкор” бош мураббийи учрашувдан кейинги матбуот анжуманида ўз шогирдларидан миннатдор эканлигини изҳор қилди:

- Ўйин оғир кечди. Бунақанги кучли клубга қарши сафарда тўп суриш қийин. Футболчиларимиз бехато ўйнашди ва ғалабага ҳақли равишда эришишди. Мен шогирдларимга улар мақсад сари буткул берилиб ҳаракат қилишгани учун миннатдорчилик билдираман. Бугун корейсларнинг Чо Чан-Хо (№26), Зику (№27), Парк Сун-Хо (№11), Ким Тэ-Су (№14) ва Шин Хюн-Мин (№20) каби футболчилари кўп асабларимизни олишди. Улар айниқса ўнг қанотдан кўп ҳавф солишди. Аммо ўйинчиларимиз уларнинг босимини бартараф эта олдилар. Бу ютуғимизни халқимизга Наврўз байрамига совға сифатида бағишлаймиз.

- Шогирдларингиз жарима майдончаси ташқарисидан кўп бор зарба беришди. Бу махсус кўрсатма эдими?
- Агар дарвоза томон зарба бермасангиз - гол бўлмайди. Биринчи голда шогирдларим тўпни яхши назорат қилиб, Тўраевни қулай вазиятга чиқаришди. Лутфулла очиқ зонага кириб бориб, Козакнинг чиройли пасини йўққа чиқармади. Рақиб зарба беришга имконият қолдиряптими, бундан ҳар доим фойдаланиш лозим.