Учрашув якунлангач, Поханни забт этган футболчиларимиз микст-зонада тезроқ пайдо бўлишини кутдик. Бугун бехато ўйнаб, муваффақиятга ўзининг муносиб ҳиссасини қўшган ҳимоячи Хайрулла Каримов журналистлар билан мулоқот қилиш ҳудудида кўриниш берди:

«Ўйин осон ўтмади. Ўзингиз кўрдингиз, мезбонлар тинимсиз равишда ҳужум қилишди. Аммо биз аввалги ўйинда имкониятни бой берганимиз учун, вазиятни ўнглашимиз зарур эди. Барчамиз шуни ўйлаган ҳолда ҳаракат қилдик».

«Ким бизга мухлислик қилган бўлса, барчани муҳим ғалаба билан чин юрагимдан табриклайман. Бу Наврўз байрамига биз томондан ўзига хос совға бўлди, деб ўйлайман».

- Похан Стилерзнинг сермаҳсул ҳужумчиси - руминиялик Ианис Зикуни ўйиндан чиқара олдим, дея оласизми?
- Йўқ. Ғалабада битта менинггина ҳиссам бор эмас. Бугун бутун жамоамиз ютди. Ҳамма бир хил ҳаракат қилди. Бизнинг муваффақиятимизга бирдамлик пойдевор бўлди.