Футзал бўйича клублар ўртасида бўлиб ўтаётган Осиё чемпионатининг финал босқичига чиқиш учун саралаш ўйинларида бугун “Ардус” жамоаси дам олади. Куннинг биринчи ўйинида “Ар-Райян” ва “Ал-Карх” жамоалари куч синашишди.

Ўйинда қатарликлар 7-2 ҳисобида ғалаба қозонишди. Эътиборли томони, учрашувдаги биринчи ва энг сўнгги голлар ироқликлар томонидан урилди. Шундан сўнг “Ар-Райян” футболчилар уйғонгандек бўлишди ва кетма-кет рақибларига дарвозасига голлар уришди. Бу ўйинда Қатар клубининг испаниялик легионери Карлос Карбо 5та гол уришга муваффақ бўлди.

Ушбу ғалабадан кейин “Ар-Райян” ҳисобидаги очколар сони 4тага етди.

“АЛ-КАРХ” – “АР-РАЙЯН” – 2:7

Ўйиндан кейин ўтказилган матбуот анжуманида “Ал-Карх” бош мураббийи мағлубият сабабини Ироқ футбол федерациясининг жамоага нисбатан муносабитини келтирди. Унинг айтишича, “Ал-Карх”нинг бу мусобақага ташриф буюриши катта сўроқ остида бўлган ва сўнгги кун кечаси уларнинг Тошкентга келишларини айтишган.

“Ар-Райян”нинг испаниялик бош мураббийи эса ақлли ўйин орқали ғалаба қўлга киритилганини ва ушбу ўйинга Карлос Корбони тушириб тўғри қилганини таъкидлади.

Соат 19:00да эса “Налоговик” (Қирғизистон) ва “Ал-Васл” (БАА) жамоалари ўртасида ўйин бошланади. Бу ўйинда мағлуб бўлган жамоа амалда финал босқичи йўлланмасидан маҳрум бўлади.