Италия А серияси ўйинлари мамлакатдаги коронавирус билан боғлиқ вазият туфайли яна бўш трибуналар билан ўтказилиши мумкин, деб хабар бермоқда “Corriere dello Sport”.

Манбага кўра, Италия соғлиқни сақлаш идоралари трибуналардаги томошабинлар ниқоб режимига риоя қилмаётганидан норози. Вазирлар кенгашининг сўнгги йиғилишида мамлакатдаги стадионларни тўлиқ ёпиб қўйиш масаласи муҳокама қилинди.

Эслатиб ўтамиз, 2020 йилнинг март ойида А серия мавсуми коронавирус пандемияси туфайли тўхтатилган эди. Ўша йилнинг июнь ойида мавсум қайта тикланди, аммо барча ўйинлар бўш трибуналар билан ўтказилди.

Италия чемпионати турнир жадвалида 19 учрашувда 46 очко жамғарган “Интер” етакчилик қилмоқда. Кучли учликдан “Милан” (45) ва “Наполи” (40) жой олган.