ФИФА 2021 йил бўйича бир қатор муҳим ҳисоботларни тақдим эта бошлади. Улар орасида трансфер ҳисоботи ҳам бор. Қуйида ушбу ҳисоботдаги баъзи эътиборли нуқталарга назар ташлаймиз (Ўзбекистонга оид рақамлар ҳам йўқ эмас).

18 068 та. Бу 2021 йил давомида амалга оширилган халқаро трансферлар сони (эркаклар профессионал футболида). Солиштирадиган бўлсак, бу 2020 йилдаги рақамдан 5,1% га кўп дегани. 2019 йилга нисбатан эса бор йўғи 12 та кам трансфер амалга оширилган. Демак, давом этган коронавирус пандемиясига қарамай бозор тикланаётгандек кўринади (хулосага шошмаймиз).

4,86 млрд АҚШ доллари — умумий трансфер қиймат кўрсаткичи. 2020 йилдан 13,6% камроқ, 2019 йилдан эса 33,8% кам.

$300 000 — трансфер қийматларининг медиана (ўрталик) чизиғи. Яъни, барча амалга оширилган трансферларни ярми бу суммадан пастроқ, қолган қисми эса юқорироқ тарзда амалга оширилган.

Топ-10 трансфер қиймати 730 млн. доллар кўринишида бўлиб, бу умумий қийматнинг 15 фоизига тенгдир.

7656 та трансферда футболчининг ёши 18-23 оралиғида бўлган ва бундаги қиймат - 2,827 млрд долларга тенг.

Энг кўп сотилган футболчилар — бразилияликлар (1749 та).

Футболчиларининг умумий қиймати бўйича энг катта кўрсаткич Францияда — 643,6 млн. доллар. Эътиборлиси, сўнгги ўн йилда илк бор бу борада Бразилия устунликни бошқа мамлакатга бериб қўймоқда.

Ўзбекистонга оид рақамлар

ФИФА ҳисоботида ўзбек футболига оид трансферлар борасида ҳам баъзи рақамлар келтирилган. Масалан, ўтган йил ташкилот Ўзбекистонда 160 та трансфер шартномасини қайд этган. Бу камми ё кўп, бир нарса дейиш қийин. Минтақадаги кўшнимиз Қозоғистонда бу рақам 282 та бўлса, Тожикистонда 80 та.

Давоми бор.