FIFA 2021 yil bo‘yicha bir qator muhim hisobotlarni taqdim eta boshladi. Ular orasida transfer hisoboti ham bor. Quyida ushbu hisobotdagi ba’zi e’tiborli nuqtalarga nazar tashlaymiz (O‘zbekistonga oid raqamlar ham yo‘q emas).

18 068 ta. Bu 2021 yil davomida amalga oshirilgan xalqaro transferlar soni (erkaklar professional futbolida). Solishtiradigan bo‘lsak, bu 2020 yildagi raqamdan 5,1% ga ko‘p degani. 2019 yilga nisbatan esa bor yo‘g‘i 12 ta kam transfer amalga oshirilgan. Demak, davom etgan koronavirus pandemiyasiga qaramay bozor tiklanayotgandek ko‘rinadi (xulosaga shoshmaymiz).

4,86 mlrd AQSH dollari — umumiy transfer qiymat ko‘rsatkichi. 2020 yildan 13,6% kamroq, 2019 yildan esa 33,8% kam.

$300 000 — transfer qiymatlarining mediana (o‘rtalik) chizig‘i. Ya’ni, barcha amalga oshirilgan transferlarni yarmi bu summadan pastroq, qolgan qismi esa yuqoriroq tarzda amalga oshirilgan.

Top-10 transfer qiymati 730 mln. dollar ko‘rinishida bo‘lib, bu umumiy qiymatning 15 foiziga tengdir.

7656 ta transferda futbolchining yoshi 18-23 oralig‘ida bo‘lgan va bundagi qiymat - 2,827 mlrd dollarga teng.

Eng ko‘p sotilgan futbolchilar — braziliyaliklar (1749 ta).

Futbolchilarining umumiy qiymati bo‘yicha eng katta ko‘rsatkich Fransiyada — 643,6 mln. dollar. E’tiborlisi, so‘nggi o‘n yilda ilk bor bu borada Braziliya ustunlikni boshqa mamlakatga berib qo‘ymoqda.

O‘zbekistonga oid raqamlar

FIFA hisobotida o‘zbek futboliga oid transferlar borasida ham ba’zi raqamlar keltirilgan. Masalan, o‘tgan yil tashkilot O‘zbekistonda 160 ta transfer shartnomasini qayd etgan. Bu kammi yo ko‘p, bir narsa deyish qiyin. Mintaqadagi ko‘shnimiz Qozog‘istonda bu raqam 282 ta bo‘lsa, Tojikistonda 80 ta.

Davomi bor.