Нидерландиялик футболчи ва қиз ҳакам оила қурадиган бўлишди. Қизиғи, бу рефери вақтида бўлажак турмуш ўртоғи майдондан четлатилган ўйинда ишлаганди. Ҳа, инсон муҳаббат қаердан келишини билмайди. Гап Эредивизиондан кейинги ўринда турувчи лига иштирокчиси «Эммен» клубининг чап қанот ҳимоячиси Жефф Хардевельд ва ҳакам Шона Шукрула ҳақида кетмоқда. Эътиборли томони, улар илк марта айнан Жефф қизил карточка олган учрашувда танишишган. Ўша баҳсда Шона захира ҳаками ролини бажарган.
Аниқроқ айтганда, Жефф Хардевельд ва Шона Шукрула ўтган йилнинг август ойида бўлиб ўтган ўйинда тўқнашишган. Нидерландия Эредивизиони доирасидаги «Эммен» - «Эйндховен» учрашувининг 90}1-дақиқасида бош ҳакам Жеффга тўғридан-тўғри қизил карточка кўрсатади, бироқ у маълум вақт майдондан чиқиб кетишни пайсалга солади. Натижада захира рефериси Шона футболчи олдига югуриб бориб, ундан тезроқ кийиниш хонасига чиқиб кетишини сўрайди. Ўзига хос танишув... «Эммен» якунда ўша учрашувни минимал ҳисобда бой беради. Шунга қарамай, Жефф хафа эмасди. Ахир у маҳбубасини учратганди.
Жефф ва Шона шундан сўнг дарҳол учраша бошладилар ва мана, орадан 6 ой ўтиб, йигит қизга турмуш қуриш таклифи билан чиқди. Шона бир ҳафтача муқаддам Римда Жефф билан бирга тушган суратини ижтимоий тармоққа жойлаштириб, қисқача изоҳ қолдирганди: «Расман». Шукрула 2009 йилдан буён ҳакам сифатида фаолият юритмоқда. 26 ёшли Хардевельд эса «Фейеноорд» клуби тарбияланувчисидир. Тўғри, унга Роттердам клубида ўз ўрнини топиш насиб этгани йўқ. Жефф аввалига «Утрехт», 2017 йили «Хераклес» сафига қўшилди. «Эммен» билан эса ўтган йилнинг ёзида эркин агент мақомида шартнома тузди. Нидерландиялик футболчи энди бу трансферни ўз ҳисобига ёзиб қўйиши мумкин. Ҳар ҳолда, «Эммен» ўйинидаги вазият ортидан умр йўлдошини топди.
