ПСЖ ҳужумчиси Лионель Месси кеча, 24 январь куни ресторанда "Барселона"нинг айрим вакиллари билан учрашди, деб хабар беради "OnzeTV3".
Манба берган хабарга кўра, аргентиналик футболчи Каталония клуби бош мураббийи Хави ва ярим ҳимоячи Серхио Бускетс ҳамроҳлигида кечки овқат тановул қилган.
34 ёшли Месси 2021 йилнинг ёзида шартномадаги қийинчиликлар туфайли “Барселона”ни тарк этган эди. Янги мавсум бошидан буён ҳужумчи ПСЖ сафида тўп сурмоқда. Парижликлар сафида футболчи 1-лиганинг 12 учрашувида 1 та гол урди ва 5 та голли узатмани амалга оширди.
