Ўзингизга маълум, барча жамоаларда янги мавсум олдидан “келди-кетдилар” бўлади. Бу ҳам футболнинг бир қисми саналади. “Аждарлар” сафида ҳам ўзгаришлар бўлди. Ўтган мавсумда жамоа шарафини ҳимоя қилган Андрия Калудерович ва Дониёр Нарзуллаевлар "аждарлар" сафини тарк этишди.
Бундан ташқари мураббийлар штабида ҳам ўзгариш бўлди. Жамоа дарвозабонлари мураббийи Денис Иванков ҳам жамоани тарк этди.
Шунингдек Шоҳмалик Комилов, Жасур Жумаев ва Жўрабек Манноновлар Самарқанднинг “Динамо” жамоасига “Насаф”футбол клуби учун молиявий фойдали шартлар асосида, Абубакр-Ризо Турдиалиев эса “Олимпик” жамаосига бир мавсумга ижарага берилди.
Жамоа мухлисларидан юқоридаги ҳолатлардан тушкунликка тушмасликларини сўраб қолинади. Ёдингизда бўлса, “Насаф” футбол клуби раҳбарияти 2021 йилги мавсум ўртасида жамоанинг асосий ўн тўрт нафар етакчи футболчилари билан шартномаларни узоқ муддатга чўзган эди. 2021 йил мавсум охирида яна бир етакчи футболчи, Самарқандда бўлиб ўтган Ўзбекистон Кубоги финалида ғалаба голини киритган Ғолиб Ғайбуллаев ҳам жамоа билан шартномани уч йил муддатга узайтирди.
“Насаф” футбол клуби томонидан ижарага берилган, юқорида келтирилган футболчиларнинг ҳам клуб билан узоқ муддатли шартномалари бор. 2022 йилги футбол мавсуми якунланганидан сўнг футболчилар жамоамизга келиб қўшилишади.
