O‘zingizga ma’lum, barcha jamoalarda yangi mavsum oldidan “keldi-ketdilar” bo‘ladi. Bu ham futbolning bir qismi sanaladi. “Ajdarlar” safida ham o‘zgarishlar bo‘ldi. O‘tgan mavsumda jamoa sharafini himoya qilgan Andriya Kaluderovich va Doniyor Narzullayevlar "ajdarlar" safini tark etishdi.
Bundan tashqari murabbiylar shtabida ham o‘zgarish bo‘ldi. Jamoa darvozabonlari murabbiyi Denis Ivankov ham jamoani tark etdi.
Shuningdek Shohmalik Komilov, Jasur Jumayev va Jo‘rabek Mannonovlar Samarqandning “Dinamo” jamoasiga “Nasaf”futbol klubi uchun moliyaviy foydali shartlar asosida, Abubakr-Rizo Turdialiyev esa “Olimpik” jamaosiga bir mavsumga ijaraga berildi.
Jamoa muxlislaridan yuqoridagi holatlardan tushkunlikka tushmasliklarini so‘rab qolinadi. Yodingizda bo‘lsa, “Nasaf” futbol klubi rahbariyati 2021 yilgi mavsum o‘rtasida jamoaning asosiy o‘n to‘rt nafar yetakchi futbolchilari bilan shartnomalarni uzoq muddatga cho‘zgan edi. 2021 yil mavsum oxirida yana bir yetakchi futbolchi, Samarqandda bo‘lib o‘tgan O‘zbekiston Kubogi finalida g‘alaba golini kiritgan G‘olib G‘aybullayev ham jamoa bilan shartnomani uch yil muddatga uzaytirdi.
“Nasaf” futbol klubi tomonidan ijaraga berilgan, yuqorida keltirilgan futbolchilarning ham klub bilan uzoq muddatli shartnomalari bor. 2022 yilgi futbol mavsumi yakunlanganidan so‘ng futbolchilar jamoamizga kelib qo‘shilishadi.
