Футбол тарихи ва статистикаси халқаро федерацияси дунё клубларининг апрель ойи рейтинг жадвалини эълон қилди. Одатда, мавсум бошланганидан кейин клубларимизнинг мазкур рейтингда эгаллаб турган ўринларида ўсиш кузатиларди. Аммо халқаро мусобақада иштирок этаётган “Насаф”, “Бунёдкор” ва “Пахтакор” жамоалари ўз ўринларини пасайтиришган. Бу жадвал клубларнинг сўнгги 12 ой ичида қайд этган расмий натижаларини ҳисобга олишини инобатга оладиган бўлсак, демак, клубларимиз халқаро майдонда ўтган йили март ойидагига нисбатан ёмон натижаларни қайд этишган.

Ўтган ой рейтингида 89-ўринни эгаллаб турган “Насаф” 127-поғонага тушиб кетган бўлса, “Бунёдкор” 11 ўрин пастлаб, 218-қаторга жойлашди. “Пахтакор” эса кучли 300таликни тарк этди. “Шерлар” янги рейтингда 314-ўринни эгаллаб туришибди. “Пахтакор”нинг аввалг ойда 264-поғонани эгаллаб турганини инобатга олсак, жамоа катта пасайишга мажбур бўлганини сезиш қийин эмас. Топ-400га бошқа жамоаларимиз ҳали киришга муваффақ бўлишмади.

Рейтинг жадвалининг тепасини “Барселона” ва “Реал” клублари ҳеч кимга беришмаяпти. Аргентинанинг “Велез Сарсфильд” клуби ҳам кучли учликни бўшатмади. Чилининг “Универсидад” ва Германиянинг “Бавария” клублари 4 ва 5-ўринларга кўтарилиб олишди. “Сантос” — 6, “Атлетико” эса 7га кўтарилган. Манчестер шаҳрининг икки жамоаси — “Юнайтед” ва “Сити” 8 ва 9-поғоналарга тушиб кетишди.

Рейтингнинг тўлиқ кўриниши билан IFFHS сайтида танишиб олишингиз мумкин.