«Бухоро» ўз майдонида дуранг қайд этгани учун жамоа бош мураббийи Жамшид Саидовнинг кайфияти кўтаринки эмасди. Шунга қарамай, олий лигадаги энг ёш бош мураббий ўйиндан кейин қисқача интервью беришни лозим топди.

- Жамшид ака, бугунги баҳс ҳақида нима дея оласиз?
- Бугун иккита фарқли таймга гувоҳ бўлдик. Биринчи бўлимда шогирдларим яхши ўйин кўрсатиб гол уришди. Лекин танаффусдан кейин рақиб устунликни ўз қўлига олди. Шунча хавфли вазиятни юзага келтирганимиз билан биттадан кўп гол ура олмадик. Натижада рақибнинг қарши ҳужумда тўп киритиши ўйин 1:1 ҳисобида якун топишини таъминлади.

- «Бухоро» 1-турни Бухоро шаҳридаги асосий стадионда ўтказганди. Бу беллашув нима учун Вобкентга кўчирилди?
- Сабаби оддий - Бухородаги майдон ҳали тайёр эмас. Шунинг учун Вобкентда ўйнаб туришни лозим топдик. Менимча, кейинги уй учрашувимизни «Бухоро»да ўтказсак керак.

- Шогирдларингизга жиддий эътироз борми?
- Албатта, хатоларга йўл қўйилди. Лекин аниқ бир ўйинчига жиддий эътирозим йўқ.

- Ўтган турда «Андижон» устидан қозонилган ғалаба йигитларни анча талтайтириб юборди деб ўйлайсизми?
- Бўлиши мумкин. Балки футболчилар «Машъал»ни осонлик билан мағлубиятга учратамиз деб ўйлашгандир. Кўрдингиз, ўйин томонлама ютқазганимиз йўқ. Фақат кўп вазиятларда омад биздан юз ўгирди. Шунингдек, рақиб дарвозабони Санжар Қувватов ҳам яхши ҳаракат қилди.