Миланнинг «Интер» клуби «Наполи»нинг бирданига икки футболчисига қизиқиш билдирмоқда.

«Football Italia» хабарига кўра, миланликлар ёзги трансфер ойнаси вақтида неаполликлар яримҳимоячиси Хуан Суньигани сотиб олишни мақсад қилишган. 26 ёшли колумбиялик футболчининг «Наполи» билан амалдаги шартномаси 2014 йилнинг ёзига қадар амал қилади, трансфер баҳоси эса 5 миллион еврога баҳоланмоқда.

Бу мавсум Суньига «А» Сериянинг 25 учрашувида майдонга тушиб, бир марта гол урган ва бир марта жамоадошининг голига ҳаммуаллифлик қилган. Чемпионлар лигаси баҳсларида эса етти бор майдонга тушган.

Бундан ташқари, «Интер» «Наполи» ҳужумчиси Эсекиель Лавессини ҳам сотиб олишни хоҳламоқда. Аргентиналик футболчи бу мавсум барча мусобақаларда жами 33 учрашувда майдонга тушиб, 10та гол урган ва 8 марта самарали тўп узатишни амалга оширган.

Эътиборли томони, 26 ёшли футболчининг амалдаги шартномасида уни сотиб олмоқчи бўлган клуб «Наполи»га 31 миллион евро тўлаши кераклиги ёзиб қўйилган.