Италиянинг "Милан" клуби президенти Сильвио Берлускони сўнгги вақтда жамоа бош мураббийи Массимилиано Аллегрининг фаолиятидан қониқмаяпти. Бу ҳақда La Gazetta dello sport нашри хабар тарқатган.
Маълумотларга қараганда, "Милан" бу йилги Скудеттодан қуруқ қолса, Аллегри истъфога чиқиши аниқ экан. Агар шундай бўлса унинг ўрнини эгаллайдиган номзод ҳам топила қолди. Бир пайтлар "Милан" сафида ўзининг энг юлдузли онларини ўтказган, машхур "учар голланд" Марко Ван Бастен жамоа бош мураббийи курсисини эгаллаши мумкин.
Нашрнинг маълум қилишича, Берлускони айнан Ван Бастенни "Милан" бош мураббийи бўлишини истаётган экан.
Марко Ван Бастен яқиндагина Голландиянинг "Херенвен" клуби билан икки йиллик шартномага қўл қўйишга улгургани ҳам "Милан" президентини чўчитаётгани йўқ. Берлускони бу масалани компенсация тўлаш йўли билан ҳал қилишга тайёр, дейилади La Gazetta dello sport нашрида.
