Бу ҳақда ЎзПФЛ директори Диёр Имомхўжаев батафсил тўхталди.
Ўзбекистон футбол ҳакамлари марказини ташкил этиш таклифи маъқулланди. Босқичма-босқич барча футбол мусобақаларига ҳакамларни жалб қилиш мана шу марказ орқали амалга оширилиши керак.
Биз ЎзПФЛ томонидан ўтказиладиган мусобақаларда фаолият олиб борувчи ҳакамларнинг клублар билан алоқаларини ва ниҳоят тартибга келтиришга эришдик. Футбол ичидагилар яхши биладики, катта мусобақаларни инобатга олмаса, қолган барчасида футбол клублари ҳакамлар гонорарини бевосита тўлаб келарди. 2021 йилда мана шу ҳолатга тўла чек қўйдик. Яъни, барча мусобақалар учун ҳакамларга гонорар ЎзПФЛ томонидан нақдсиз кўринишда тўлаб берилди. Ҳакам ва клуб олди-бердиси расмий мақомда йўқолди.
2022 йилги мавсумдан бошлаб ҳакамларнинг йўлкира ҳамда яшаш ҳаражатлари ҳам клублар бўйнидан соқит қилиниши режалаштирилган. Албатта бошида қийин бўлади. Эвазига эса биз тўғри йўналишга тушишда давом этамиз.
Босқичма-босқич клубларда ҳам нақд пул айланмасига чек қўйилиши, сотилган чипталар тўлиқ инкас қилиниши тизимига ўтилади. Бу орқали клублар ва ҳакамлар ўртасидаги боғлиқликларга жуда катта болта уриш мумкин. Худди ЎзПФЛ каби клублар ҳам ўз таъсисчилари олдида ростмана ҳисобдор бўлиши шарт.
Буларнинг барчаси вақт талаб қилади, бирданига амалга ошмайди. Аммо ишонамизки, кўтарма пуллари ибораси вақт сайин йўқолгани каби, тиббий текширув монополиясига босқичма-босқич чек қўйилгани каби, ҳакамлар тўловлари тартибга келгани каби, юқоридаги масалаларда ҳам нормал тизим ишлай бошлайди. Ортга йўл йўқ.
