Bu haqda O‘zPFL direktori Diyor Imomxo‘jayev batafsil to‘xtaldi.
O‘zbekiston futbol hakamlari markazini tashkil etish taklifi ma’qullandi. Bosqichma-bosqich barcha futbol musobaqalariga hakamlarni jalb qilish mana shu markaz orqali amalga oshirilishi kerak.
Biz O‘zPFL tomonidan o‘tkaziladigan musobaqalarda faoliyat olib boruvchi hakamlarning klublar bilan aloqalarini va nihoyat tartibga keltirishga erishdik. Futbol ichidagilar yaxshi biladiki, katta musobaqalarni inobatga olmasa, qolgan barchasida futbol klublari hakamlar gonorarini bevosita to‘lab kelardi. 2021 yilda mana shu holatga to‘la chek qo‘ydik. Ya’ni, barcha musobaqalar uchun hakamlarga gonorar O‘zPFL tomonidan naqdsiz ko‘rinishda to‘lab berildi. Hakam va klub oldi-berdisi rasmiy maqomda yo‘qoldi.
2022 yilgi mavsumdan boshlab hakamlarning yo‘lkira hamda yashash harajatlari ham klublar bo‘ynidan soqit qilinishi rejalashtirilgan. Albatta boshida qiyin bo‘ladi. Evaziga esa biz to‘g‘ri yo‘nalishga tushishda davom etamiz.
Bosqichma-bosqich klublarda ham naqd pul aylanmasiga chek qo‘yilishi, sotilgan chiptalar to‘liq inkas qilinishi tizimiga o‘tiladi. Bu orqali klublar va hakamlar o‘rtasidagi bog‘liqliklarga juda katta bolta urish mumkin. Xuddi O‘zPFL kabi klublar ham o‘z ta’sischilari oldida rostmana hisobdor bo‘lishi shart.
Bularning barchasi vaqt talab qiladi, birdaniga amalga oshmaydi. Ammo ishonamizki, ko‘tarma pullari iborasi vaqt sayin yo‘qolgani kabi, tibbiy tekshiruv monopoliyasiga bosqichma-bosqich chek qo‘yilgani kabi, hakamlar to‘lovlari tartibga kelgani kabi, yuqoridagi masalalarda ham normal tizim ishlay boshlaydi. Ortga yo‘l yo‘q.
