«ПСЖ» ҳужумчиси Мауро Икарди қишки трансфер ойнасида «Ювентус»га ўтмади, бироқ унга А сериянинг бошқа клублари қизиқиш билдирмоқда.
Calciomercato нашри хабарига кўра, 29 ёшли аргентиналик футболчининг хизматларига «Милан», «Наполи» ва «Рома» қизиқиш билдирмоқда. «Милан» ҳужум чизиғини ёшартирмоқчи, «Наполи» марказий ҳужумчи позициясида рақобатни кучайтирмоқчи. «Рома» эса ҳужум чизиғидаги футболчилардан кўнгли тўлмаган ва ушбу камчиликни аргентиналик футболчи орқали тўлдирмоқчи.
Икарди «ПСЖ»га 2019 йилда «Интер»дан келиб қўшилганди. Парижликлар аввалига футболчини бир йилга ижарага олишди, кейин эса 50 миллион евро эвазига тўлиқ трансферни амалга оширишди.
Жорий мавсумда Икарди Франция чемпионатининг 20 та ўйинида 4 та гол муаллифига айланди. Ҳужумчининг шартномаси 2024 йилда тугайди ва Transfermarkt Икардини 28 миллион еврога баҳолаган.
