Польша ЖЧ-2022 саралашида Россияга қарши ўйиндан бош тортгани учун жаримага тортилиши ёки турнирдан четлаштирилиши мумкин.
Шанба куни Польша футбол иттифоқи (ПФУ) президенти Сезари Кулеса “Польша терма жамоаси Россия жамоасига қарши плей-офф ўйинини ўтказишдан бош тортмоқда”, деб айтди. Худди шу позицияни поляклар сардори, “Бавария” ҳужумчиси Роберт Левандовски эгаллади.
Полша томони вакилларининг баёнотлари билан боғлиқ ҳолда, биз ФИФА регламентининг мусобақалар бошланганидан кейин иштирок этишдан бош тортган тақдирда мумкин бўлган санкцияларга оид қоидаларини тақдим этамиз.
2022 йилги Жаҳон чемпионати саралаши регламентига кўра, "саралаш ўйинлари бошланганидан кейин иштирок этишдан бош тортган ҳар қандай футбол ассоциацияси камида 40 000 евро миқдорида жаримага тортилади".
Рад этиш қарори қабул қилинган ҳолатларга қараб, ФИФА Тартиб-интизом қўмитаси жаримадан ташқари “бошқа жазо чораларини қўллаш, жумладан, ассоциацияни кейинги ФИФА турнирларида иштирок этишдан четлаштириш” ҳуқуқига ҳам эга.
Ўйналмаган ёки ўтказиб юборилган ҳар қандай ўйин, ФИФА томонидан эътироф этилган форс-мажор ҳолатлари бундан мустасно, “ФИФА Тартиб-интизом кодексига мувофиқ ФИФА Тартиб-интизом қўмитаси томонидан тегишли ассоциацияларга нисбатан санкция қўлланилишига олиб келиши мумкин”. Агар ФИФА форс-мажор факторини тан олса, унда бундай ҳолларда тартиб-интизом қўмитаси ўйинни қайта ўтказишни талаб қилиши мумкин.
Ўйиннинг бекор қилиниши ёки тўхтатилиши учун масъул бўлган ассоциация бундай қарор билан боғлиқ бўлган "ФИФА, ўйинни ташкил қилувчи ассоциациядан харажатларни қоплашни талаб қилиши" мумкин.
ЖЧ-2022 саралашининг плей-офф босқичидан ўрин олган Россия - Польша ўйини қура натижасига кўра 24 март куни Москвада бўлиб ўтиши керак.
