Polsha JCH-2022 saralashida Rossiyaga qarshi o‘yindan bosh tortgani uchun jarimaga tortilishi yoki turnirdan chetlashtirilishi mumkin.
Shanba kuni Polsha futbol ittifoqi (PFU) prezidenti Sezari Kulesa “Polsha terma jamoasi Rossiya jamoasiga qarshi pley-off o‘yinini o‘tkazishdan bosh tortmoqda”, deb aytdi. Xuddi shu pozisiyani polyaklar sardori, “Bavariya” hujumchisi Robert Levandovski egalladi.
Polsha tomoni vakillarining bayonotlari bilan bog‘liq holda, biz FIFA reglamentining musobaqalar boshlanganidan keyin ishtirok etishdan bosh tortgan taqdirda mumkin bo‘lgan sanksiyalarga oid qoidalarini taqdim etamiz.
2022 yilgi Jahon chempionati saralashi reglamentiga ko‘ra, "saralash o‘yinlari boshlanganidan keyin ishtirok etishdan bosh tortgan har qanday futbol assosiasiyasi kamida 40 000 yevro miqdorida jarimaga tortiladi".
Rad etish qarori qabul qilingan holatlarga qarab, FIFA Tartib-intizom qo‘mitasi jarimadan tashqari “boshqa jazo choralarini qo‘llash, jumladan, assosiasiyani keyingi FIFA turnirlarida ishtirok etishdan chetlashtirish” huquqiga ham ega.
O‘ynalmagan yoki o‘tkazib yuborilgan har qanday o‘yin, FIFA tomonidan e’tirof etilgan fors-major holatlari bundan mustasno, “FIFA Tartib-intizom kodeksiga muvofiq FIFA Tartib-intizom qo‘mitasi tomonidan tegishli assosiasiyalarga nisbatan sanksiya qo‘llanilishiga olib kelishi mumkin”. Agar FIFA fors-major faktorini tan olsa, unda bunday hollarda tartib-intizom qo‘mitasi o‘yinni qayta o‘tkazishni talab qilishi mumkin.
O‘yinning bekor qilinishi yoki to‘xtatilishi uchun mas’ul bo‘lgan assosiasiya bunday qaror bilan bog‘liq bo‘lgan "FIFA, o‘yinni tashkil qiluvchi assosiasiyadan xarajatlarni qoplashni talab qilishi" mumkin.
JCH-2022 saralashining pley-off bosqichidan o‘rin olgan Rossiya - Polsha o‘yini qura natijasiga ko‘ra 24 mart kuni Moskvada bo‘lib o‘tishi kerak.
