"Навбаҳор"-"Бунёдкор" учрашувидан сўнг ўтказилган матбуот анжуманида наманганлик футболчилар устози Мустафо байромов жамоасининг амалдаги чемпион устидан қозонилган муҳим ғалабасини қуйидагича изоҳлади:

— Аввало "Навбаҳор мухлисларини ғалаба билан табриклайман, бу кунни улар узоқ кутишган эди. Бугунги ўйин жудаям қийин тарзда кечди. Бу ўйинга фақат ғалабани кўзлаб майдонга тушган эдик. Олдимизда бошқа йўл ҳам йўқ эди, ҳамма юзага келган вазиятни кўриб билиб турганди "Локомотив"дан қабул қилиб олган мағлубиятимиздан сўнг, аввалги ўйинларимизни таҳлил қилиб чиқдик ва ўйинчиларга тегишли кўрсатмаларни бердик.

Яна шу нарсани таъкидлаб ўтишни хоҳлардимки, янги келган мураббий Александр Евгеньевич ўйинчилар билан суҳбатлашиб чиқди ва жамоанинг руҳини кўтаришга харакат қилди.

— Бугунги рақиб тўғрисида нима дея оласиз?

— Рақибимиз "Бунёдкор" эканлигини ўзиёқ кўп нарсани англатиб турибди, барча позицияларда савияли ўйинчилар жамланган, бугунги ўйинда бизга омад кулиб боқди, иштиёқ ҳам ниҳоятда баланд эди.

— Бугунги ўйинда қисқа тўп узатишлар кўп амалга оширилди, бу хақда фикрларингиз билан ўртоқлашсангиз ?

— Хақиқатдан тўғри таъкидлаб ўтдингиз бугунги ўйинда кўпроқ қисқа тўп узатишлар орқали ўйнаш тўғрисида кўрсатмалар берилганди. Узоққа йўналтирилган тўп узатишларда ўйинимиз қовушмаяётганди. Бугун эса барчаси бизга қўл келди. Бундан ташқари стандарт вазиятлар устида ҳам тер тўкиб меҳнат қилгандик, кўриб турганингиздек стандарт вазиятлар эвазига натижага эришдик. Умуман олганда бугунги ўйин учун йигитларга катта раҳмат айтмоқчиман ва яна бир борр барчани ғалаба билан муборакбод этаман.

— Жаъфар Ирисметовни бугун майдонда кўрмадик Унинг жароҳати борми?

— Ҳа, Жаъфарда жароҳат бор ва у бугунги ўйинга тайёр эмасди.