Якунланган турнинг қаҳрамонларидан бири «Динамо» ҳужумчиси Иван Нагаев бўлди. Терма жамоамизга номзод бўлган иқтидорли ҳужумчи «Андижон»га қарши кечган баҳсда «дубль» қайд этиб жамоаси ғалабасига ҳисса қўшди. Учрашувдан кейин футболчи клуб расмий сайтига ўйин ҳақида гапириб берди.
«Жамоамиз учта ўйиндан бери мағлубиятга учраётганди. Бу эса яна давом этмаслиги керак эди. Биз албатта қачондир очко олишимиз зарур эди. Кўриб турибсиз, Андижонда омадимиз чопди. Иккита гол уриб ғалабага ўз ҳиссамни қўшганимдан хурсандман. Бундай ҳолат ҳар қандай ўйинчига ёқимли туюлади».
«Динамо» учун мавсум омадсиз бошлангани борасидабирор нарса дея олмайман. Балки бизга нимадир етишмагандир. Аслида таркибимиз яхши ўйинчилардан ташкил топган. Ҳали ҳаммаси олдинда деб ўйлайман».
«Бугун киритган иккала голим ўзимга ҳам ёқди. Лекин энг муҳими бу эмас. Муҳими, биз ғалаба қозондик».
«Ҳужумдаги шерикларим билан бир-биримизни аста-секин тушуниб боряпмиз. Тўғри, илк бор ҳужумда Рўзим Аҳмедов билан бирга тўп суряпман. Лекин у билан яхши тандем бўла оламиз, деб ўйлайман. Бугун ҳам ёмон ўйин кўрсатмадик. Мухлисларимизни хушнуд этганимиздан хурсандмиз. Ўйлайманки, буёғига шу руҳда давом этамиз», дея футболчининг сўзларидан иқтибос келтирмоқда "Динамо" расмий сайти.