Мессининг биринчи бўлимга қўшиб берилган дақиқаларнинг иккинчиси бошланаётган бир паллада майдон марказида адашиши "Барселона"га қимматга тушиши мумкин.

Айнан шу хатодан сўнг тўп чап қанoтдан қарши ҳужумга отланган Рамиресга оширилди у эса "Барса" жарима майдони ичида кўндаланг узатма билан дастлабки 45 дақиқа ичида ўйинни бироз совутиш учун майдонга 7 марта юмалаган, бироқ пировардида отдек эканлиги маълум бўлган Дрогбани тўп билан таъминлади. Дрогба эса бунақа голларни қандай қилиб уришни билади.

Тахмин қилинганидек, итальян мутахассис Роберто ди Маттео шогирдлари иккинчи бўлимни зич ҳимоя ва қарши ҳужум учун фурсат пойлаб ўтказишди. Тўп билан муомала қилиш 79% га 21%. Бурчак тўплари, дарвоза соҳасига аниқ зарбалар бериш бўйича ҳам "Барселона" катта кўрсаткич билан олдинга ўтиб кетгани билан, бу устунлик ҳисобда акс этмади.

"Челси" чиройли ҳимояланди, "Барселона"га мутлақо имконият бермади, дейиш нотўғрироқ бўларди. "Барселона"да гол киритиш учун имкониятлар ҳаддан ташқари кўп бўлди. Ё ҳужумчиларнинг ноаниқ зарбаси ёки Питер Чехнинг ажойиб "сейв"лари, боз устига, "Стемфорд Бриж" дарвозаларининг тўсинию-устуни "Барселона"нинг гол киритишига монелиқ қилди.

Лондоннинг намчил ҳавоси, стадиондаги муҳит "Челси"га ёрдам берган бўлиши мумкин. Нима бўлганда ҳам, "Челси" "Стэмфорд Бриж"да ҳақли ғалаба эришди. Германиялик ҳакам Феликс Брих эса ўйинни бирорта жузий хатоларсиз бажаргани таҳсинга лойиқ.

Энди келаётган сешанбада эни 90 метрли "Ноу Камп" чимида ҳам "Челси"нинг бу ҳимояланиш услуби иш бериш-бермаслигини томоша қиламиз.

ЕВРОПА ЧЕМПИОНЛАР ЛИГАСИ – 2011/12.
Ярим финал. Дастлабки учрашув

ЧЕЛСИ (Англия) – БАРСЕЛОНА (Испания) 1:0 (1:0)
Гол:  Дрогба (45).
Челси: Чех, Иванович, Кэйҳилл, Терри, Э.Коул, Лэмпард, Оби Микел, Мейрелеш, Мата (Калу, 74), Рамирес (Босингва, 88), Дрогба.
Барселона: Вальдес, Дани Алвес, Маскерано, Пуйоль, Адриано, Бускетс, Хави (Куэнка, 87), Иньеста, Санчес (Педро, 66), Фабрегас (Алькантара, 78), Месси.
Огоҳлантиришлар: Рамирес (69), Педро (71), Бускетс (76), Дрогба (86).
Бош ҳакам: Феликс Брих (Германия)
18 апрель, «Стэмфорд Бриж». 37.000 томошабин