«Барселона» устози Хави Европа лигаси доирасида «Галатасарой» жамоасига қарши бўлиб ўтадиган ўйин олдидан ўз фикрлари билан ўртоқлашди.

“Бу биз учун худди финалдек. Муваффақиятсиз ўйнасак - турнирни тарк этамиз.

Биринчи ўйиндагидан кўра кучлироқ ўйнашимиз керак. Ўтган ҳафтадаги баҳснинг биринчи ярмида кўрсатган ўйинимиз менга ёқмади. Бир ҳафта ўтгач, биз яхшироқ кўриндик, аммо бир неча бор омадсиз ҳаракат қилдик. «Осасуна»га қарши кўсатган ўйинимизни намойиш этишимиз керак.

Эртага ғалаба қозонишимиз керак. Бу финал. Биз еврокубокларда кураша олишимизни исботлашимиз керак. Ҳозир «Наполи»га қарши ўйиндагидек ҳолатдамиз.

Ўйлайманки, ўйин дастлабки учрашувдек бўлади. Бўшлиқларни яратишга ҳаракат қилишимиз керак. Биз кўпроқ имкониятлар яратиб, яхшироқ ҳужум қилишга ҳаракат қиламиз. Биз хатоларга йўл қўйдик ва улар жуда яхши ҳимояланишди. Пенья ажойиб ўйнади. Бу финал ва биз ўйинга шу муносабат билан яқинлашяпмиз. Биз олдинга боришни хоҳлаймиз.

Мақсадимиз келаси мавсум Чемпионлар лигасига чиқиш эканлигини кўп марта айтганман. Европа лигасида ғалаба қозониш - вариантлардан бири. Футболчилар жуда ҳаяжонда, улар Европадаги энг нуфузли турнир бўлмаса ҳам, ўзларини жанг қилишга қодир эканликларини кўрсатмоқчи”, - деди «Барселона» устози.