Бугун “Рома” Конференциялар лигаси жавоб учрашувида “Витесс”ни қабул қилади. Италия жамоалари учун энг муҳим ўйинлар олдидан Россиянинг "sport-express" нашри “buoncalcioatutti.it” сайти асосчилари ва муаллифларидан бири Алессио Семино билан суҳбат ўтказди. Ушбу суҳбатда “Рома”нинг ўзбекистонлик ҳужумчиси Элдор Шомуродовнинг муаммолари ва у нега римликлар асосий таркибидан жой ололмагани ҳақида ҳам алоҳида фикр билдиришди.

- “Женоа”да ўзини ёрқин кўрсатган, кейин эса Моуриньо бошчилигидаги “Рома”га ўтган Элдор Шомуродов ҳақида нима дейсиз?

- Мен Элдорнинг фаолиятини алоҳида кузатиб бораман. Бу футболчи ҳозир "Женоа" учун жуда фойдали бўларди. Афсуски, у Генуя клубини эрта тарк этди! Олдинги мутахассисларнинг иши фонида қийин вазиятга тушиб қолган “гриффинлар”нинг янги мураббий Блессин қисқа вақт ичида деярли ўтиб бўлмайдиган ҳимояни қура олди, аммо клубнинг ҳужум чизиғида катта муаммолар бор. "Женоа"да гол ура оладиган ҳужумчилар етишмаяпти. Агар ўйинда гол урсангиз,  А Серияда қолишга ёрдам берадиган очколарни қўлга киритасиз. Эҳ, Шомуродов “Женоа”да қолганида, клубга жуда катта фойда келтирган бўларди!

У ўзига-ўзи вазият ярата оладиган ва энг муҳими бутун жамоага рақибга нисбатан босим ўтказишига ёрдам берадиган футболчи ҳисобланади. Элдор бу ишларни Генуяда ҳам амалга оширди. Бу ерда унинг ўрни бор эди, қисқа вақт ичида клубда Шомуродов ўз ўрнини топа олганди. Шу сабаб Элдор тезда генуялик мухлислар ҳурматига сазовор бўлди ва "Женоа"нинг асосий таркиб футболчисига айланди. Камтарин, одобли йигит, профессионал ва меҳнаткаш Шомуродов “Женоа” клуби учун идеал футболчи ҳисобланар эди.

- Нега Шомуродов "Рома"да ўз ўйинини кўрсата олмаяпти?

- Бу ҳолатни ҳар томонлама билиш учун вазиятни клуб ичидан кузатиш ва “Рома”га алоқадор кишилар билан бевосита мулоқот қилиш керак. Мен Генуя ва унинг атрофида нима бўлаётганини яхши биламан, аммо Римда бу борада мен билан суҳбатлашадиган мутахассис йўқ. Ташқаридан қараганда, Шомуродов учун ўйин нуқтаи назаридан ҳам, бошқа вазиятлардан ҳам “Рома” қулай жой эмасдек кўринади. Аммо бу менинг субъектив фикрим, мен бу орқали ҳеч кимга таъсир ўтказмоқчи эмасман.

Элдор "Женоа"да ўйнаганида кўзлари “ёниб турарди”! Ҳозирда эса у менга хафадек бўлиб туюлади. "Женоа" раҳбарияти Элдорга ишонган. Шунинг учун Шомуродов жамоага қанчалик кераклигини ҳис қилди. Ижтимоий тармоқлар орқали ҳам унинг Генуя у учун қулайлиги сезилиб турарди. Моуриньо унга унчалик ишонмайди. Элдорда эса ўзини кўрсатиш имконияти деярли йўқ. Афтидан, Жозе ёзда “Рома” раҳбариятидан Шомани бошқа жамоага кетишини сўрайди  ва бундан ўзбекистонлик футболчининг ўз ҳам хафа бўлмаса керак.

Элдорга тезроқ майдонга тушишини чин дилдан тилайман, чунки у қилаётган меҳнати ва профессионаллиги билан майдонда кўпроқ ўйнашга лойиқ. Балки ҳозирги "Рома" унинг жамоаси эмасдир. Лекин Элдор бошқа жамоага ўтса, ишонаманки, у ўзини яхши томондан кўрсата олади Шомуродовнинг чўққиси ҳали олдинда.  Мен унинг ўйиндарини диққат билан кузатиб бораман.

Маълумот ўрнида, ўтган ёзда 26 ёшли Элдор Шомуродов 17.5 млн евро эвазига "Рома" клубига ўтди. Ўзбекистон терма жамоаси ҳужумчиси 5 йиллик, 2026 йилнинг 30 июнига қадар давом этувчи шартнома имзолади. Битим таркибида яхши ўйин кўрсатгани учун бонуслар ҳам бор. Бундан ташқари, "Женоа" клуби футболчининг кейинги трансферидан маълум миқдорда фойда кўради. Легионеримиз “бўрилар” сафида жами 30 учрашувда майдонга тушиб, 4 та гол ва 5 та голли узатма муаллифига айланди.