Миср терма жамоаси устози Карлуш Кейруш ўзини дунёнинг энг яхши мураббийлари қаторига киритди.

Унинг қўл остидаги Миср терма жамоаси ЖЧ-2022 йўлланмаси учун дастлабки ўйинда Сенегал термасини мағлуб этди (1:0).

«Ўйинимиз туфайли хафа бўлиш учун ҳеч қандай сабаб кўрмаяпман. Африка чемпионларини мағлуб этдик. Иккинчи ўйинда эса бу устунликни бор кучимиз билан ҳимоя қиламиз.

Мен 44 йилдан бери турли мамлакатларда мураббий бўлиб ишлайман. Мен 2000 дан ортиқ ўйин ўтказдим. Мен тўртта терма жамоани жаҳон чемпионатига олиб чиққан ягона мураббийман. Мен дунёнинг энг яхши ўн нафар мураббийидан бириман”, - дейди Кейруш.

Португалиялик мутахассис қўл остида ЖАР (2002), Португалия (2010), Эрон (2014, 2018) терма жамоалари жаҳон чемпионатига чиқишди. Тарихдаги энг яхши натижа Карлос Альберто Перрейрага тегишли - у жаҳон чемпионатида 6 марта бош мураббий сифатида ишлаган.