Эрон 2022 йилда Қатарда бўлиб ўтадиган жаҳон чемпионатидан четда қолиши мумкин. Бу ҳақда Эрон футбол ассоциацияси директорлар кенгаши аъзоси Меҳрдод Серадски маълум қилди.
«Биз ФИФА ва Осиё Футбол Конфедерациясидан хавотирли хабарларни эшитяпмиз», — деб ёзди Меҳрдод ижтимоий тармоқларида.
Эроннинг ЖЧ-2022дан четлатилишига кеча, 29 март куни абонементи бор 2000 нафар аёлнинг Ливанга (2:0) қарши жаҳон чемпионати саралаши доирасидаги сўнгги ўйинига ташриф буюришларига рухсат берилмагани сабаб бўлди.
Эслатиб ўтамиз, Эрон 2020 йил январь ойида ФИФА таҳдидлари туфайли аёлларга футбол ўйинларига ташриф буюришга рухсат берган эди. Ташкилот аёлларга нисбатан таъқиқ қўйганлиги сабабли Эрон терма жамоасини халқаро мусобақаларда иштирок этишдан четлаштириши мумкинлиги хабар қилинганди.
Кеча содир бўлган воқеа Эронни ЖЧ-2022 иштирокчиларидан четлаштиришгача ФИФА томонидан қаттиқ санкциялар бўлиб хизмат қилиши мумкин. Италия ОАВлари 2022 йилнинг 21 ноябридан 18 декабрига қадар Қатарда бўлиб ўтадиган жаҳон чемпионатида Италия терма жамоаси Эрон ўрнини босиши мумкинлиги ҳақида хабар берди.
