Ўзбекистон миллий терма жамоасининг ЖЧ-2014 IV саралаш босқичидаги илк рақиби Эрон Мозамбик терма жамоасини йирик ҳисобда мағлубиятга учратди – 3:0.
3 июнь куни Ўзбекистонга қарши Тошкентда бўлиб ўтадиган ўйинга тайёргарликнинг биринчи босқичини Теҳронда олиб бораётган Карлуш Кейруш шогирдлари 2 май куни Африка қитъаси вакили Мозамбик терма жамоасини Караждаги «Инқилоб» стадионида қабул қилишди.
Учрашувнинг 11-дақиқасида Ғуломий форсларни олдинга олдинга олиб чиққан бўлса, 41-дақиқада Деҳнавий ҳисобни 2:0 кўринишига олиб келди. Ниҳоят, 58-дақиқада Пежмон Нурий ҳисобни йириклаштирди. Қайд этиш керак, 80 ва 82-дақиқада бош ҳакам Мозамбик терма жамоасининг икки нафар аъзосига қизил карточка кўрсатиб, майдондан четлатди. 87-дақиқада Пежман Нурий дублга эришиши ҳам мумкин эди. Бироқ футболчи Мозамбик дарвозасига белгиланган пенальтидан аниқ фойдалана олмади.
Эрон миллий терма жамоаси тайёргарликнинг иккинчи босқичини Туркиянинг Истанбул шаҳрида олиб боради. Унинг доирасида 26 май куни Ироққа қарши ўртоқлик ўйини ташкил этилади.
