Халқаро футбол тарихи ва статистикаси федерацияси жаҳон клубларининг май ойи рейтингини эълон қилди. Жаҳоннинг энг кучли 400 клуби орасида Ўзбекистон Олий Лигасидан учта вакил жой олган.
Ўтган ой рейтингда 127-бўлган ва шу натижа билан Осиёнинг энг кучли ўн клуби қаторига кирган Қаршининг «Насаф» жамоа бу сафар ҳам, сезиларли даражада пастлаганига қарамай, ўзбек клублари орасида пешқадам бўлиб турибди. Рўзиқул Бердиев бошқарувидаги жамоа бу сафар рейтингда 167-ўринни эгаллади.
«Бунёдкор» 24 ўринга шўнғиб, айни вақтда 242-ўринни Швейцариянинг «Люцерн», Саудия Арабистонининг «Ал-Иттифоқ» жамоалари билан бўлишиб турибди. Фақатгина Тошкентнинг «Пахтакор» клуби бир қадар кўтарилишга муваффақ бўлган. Апрель ойида давомида ОЧЛ баҳсларида иккита ғалабага эришган тошкентликлар 314-ўриндан 256-ўринга кўтарилишган ва бу ўринни Польшанинг «Вроцлав», Латвиянинг «Вентспилс» ҳамда Жазоирнинг «Энтенте Спортиф» жамоалари билан бўлишиб турибди.
Осиё клублари орасида энг юқори кўрсаткични Жанубий Кореянинг «Чонбук Моторс» жамоаси қайд этган. ОЧЛнинг 2011 йилги финалчиси 63-ўринни эгаллаб турибди. Кучли ўнталикда ўзбек клубларининг ОЧЛдаги бир қатор рақиблари, хусусан, Эроннинг «Истиқлол» (Осиёда 5, жаҳонда 117), Жанубий Кореянинг «Поханг Стилерз» (9, 144) клублари бор. МДҲ мамлакатлари орасида энг юқори кўрсаткични 24-ўринни Италиянинг «Наполи» жамоаси билан бўлишиб турган Украинанинг «Металлист» (Харьков) жамоаси қайд этган.
Умумий рейтингни ҳали ҳам Испаниянинг «Барселона» жамоаси бошқариб турибди. Ундан кейинги ўринларда Мадриднин «Реал», Чилининг «Универсидад де Чили», Германиянинг «Бавария» ҳамда Мадриднинг «Атлетико» клублари эгаллаб турибди. Рейтингнинг тўлиқ кўриниши билан IFFHS сайтида танишиш мумкин.
