«Ювентус» вингери Федерико Бернардески Туринни тарк этиши мумкин, дея хабар беради журналист Никола Скира.

Манбага кўра, «кекса синьора» ва Бернардески шартномани узайтириш борасида келишувга эга эмас, шунинг учун у ёзда эркин агент сифатида клубни тарк этиши мумкин. Италиялик футболчи «Лацио»га таклиф қилинди, аммо ҳозирча футболчининг юқори маоши музокараларга тўсқинлик қилмоқда.

Бернардески «Ювентус»га 2017 йилда «Фиорентина»дан 40 миллион евро эвазига ўтган эди.

28 ёшли ҳужумчи жорий мавсумда клуб сафида барча турнирлар доирасида 28 та ўйинда майдонга тушиб, 1 та гол ва 6 та голли узатмани амалга оширди. Унинг Трансфермарктдаги нархи 15 млн еврони ташкил қилади.