Бугун «Ливерпуль»нинг «Манчестер Юнайтед»га қарши ўйинида дубл қайд этган Муҳаммад Салоҳ Премьер-лиганинг бир мавсумида «қизил иблислар» дарвозасига гол киритиш бўйича чемпионат рекордини ўрнатди.
Мисрлик ҳужумчи жорий мавсум АПЛнинг иккита ўйинида «Юнайтед» дарвозасига бешта гол урди. Биринчи даврадаги баҳсда Салоҳ хет-трик муаллифига айланганди, бу «Ливерпуль»га «Олд Траффорд»да йирик ҳисобдаги ғалабани қўлга киритишга ёрдам берди – 5:0. «Энфилд»даги бугунги учрашувда «Ливерпуль» юлдузи яна иккита гол уриб, манчестерликларни яна бир марта ранжитди ва мерсисайдликлар йирик ҳисобда ғалаба қозонди - 4:0.
Этиборлиси, Муҳаммад Салоҳ бугунги дублгача клуб ва терма жамоа учун барча турнирларда кетма-кет саккизта учрашувда гол ура олмаганди.
