Эроннинг "Сепаҳон" клуби бош мураббийи Муҳаррам Навидкия Осиё чемпионлар лигаси гуруҳ босқичи 5-тури доирасида бўлиб ўтадиган "Пахтакор"га қарши ўйин олдидан ўз фикрлари билан ўртоқлашди.

"Бизни оғир ўйин кутмоқда. Аслида бу гуруҳдаги барча ўйинлар қийин бўлмоқда. Эртага эса бизни ҳал қилувчи баҳс кутиб турибди. Бу биз учун сўнгги имконият бўлиб, ундан фойдаланишимиз керак. "Пахтакор" ажойиб ва хавфли жамоа эканини биламиз. Шунинг учун бу жамоага қарши ўйин ҳақида олдиндан бирор нарса дейиш қийин. Биз бор эътиборни ўйинга қаратган ҳолда, охирги имкониятимиздан фойдаланишимиз шарт. "Пахтакор"га қарши яхши ўйин намойиш этишимизга умид қиламан.

Футболчилар билан гаплашдим. Улар ҳам мазкур ўйинга жиддий ёндошишяпти. Ғалаба қозонсак, бизда имконият қолади ва сўнгги турда бор кучимизни беришга интиламиз. Барча футболчилар яхши ҳолатда.

Яна такрор айтаман, "Пахтакор" хавфли рақиб, улар дарвозамиз олдида кўп вазият яратиши мумкин. Шунга қарамай, биз ўз режамизни амалга ошириб, ғалаба қозонишга ҳаракат қиламиз", — деди Навидкия.