Eronning "Sepahon" klubi bosh murabbiyi Muharram Navidkiya Osiyo chempionlar ligasi guruh bosqichi 5-turi doirasida bo‘lib o‘tadigan "Paxtakor"ga qarshi o‘yin oldidan o‘z fikrlari bilan o‘rtoqlashdi.

"Bizni og‘ir o‘yin kutmoqda. Aslida bu guruhdagi barcha o‘yinlar qiyin bo‘lmoqda. Ertaga esa bizni hal qiluvchi bahs kutib turibdi. Bu biz uchun so‘nggi imkoniyat bo‘lib, undan foydalanishimiz kerak. "Paxtakor" ajoyib va xavfli jamoa ekanini bilamiz. Shuning uchun bu jamoaga qarshi o‘yin haqida oldindan biror narsa deyish qiyin. Biz bor e’tiborni o‘yinga qaratgan holda, oxirgi imkoniyatimizdan foydalanishimiz shart. "Paxtakor"ga qarshi yaxshi o‘yin namoyish etishimizga umid qilaman.

Futbolchilar bilan gaplashdim. Ular ham mazkur o‘yinga jiddiy yondoshishyapti. G‘alaba qozonsak, bizda imkoniyat qoladi va so‘nggi turda bor kuchimizni berishga intilamiz. Barcha futbolchilar yaxshi holatda.

Yana takror aytaman, "Paxtakor" xavfli raqib, ular darvozamiz oldida ko‘p vaziyat yaratishi mumkin. Shunga qaramay, biz o‘z rejamizni amalga oshirib, g‘alaba qozonishga harakat qilamiz", — dedi Navidkiya.