Ўзбекистон футзал терма жамоаси бош мураббийи Хосе Мария Мендез Озарбойжонга қарши иккинчи ўйин ҳақида ўз фикрини билдириб ўтди.

"Шогирдларим биринчи ўйиндагидан яхшироқ ҳаракат қилган бўлишсада, идеал жамоа бўлишдан анча узоқдамиз. Буни чарчоқ аломатлари билан ўлчаган бўлардим. Биз бир неча ой давомида катта ҳажмдаги ишларни амалга оширдик ва бу ҳолат ўз навбатида футболчилар аҳволига таъсир ўтказмай қолмади", - дейди Мендез.

"Испания йиғини олдидан йигитларга уч кунлик таътил берилади. Испанияда футзалчиларнинг жисмоний ҳолатини оптимал кўринишга олиб келишга ҳаракат қиламиз ва жаҳон чемпионати йўлланмаси учун кураш олиб борамиз", - дея қўшимча қилди испаниялик мутахассис.  

Шу йил 1-18 ноябрь кунлари Таиландда бўлиб ўтадиган жаҳон чемпионатига йўлланма берувчи Осиё чемпионати 25 май куни БААнинг Дубай шаҳрида старт олади. Ўзбекистон футзал терма жамоаси 11 май куни Испания жўнаб кетиб, 22 майга қадар Европа йиғинида иштирок этади ва ўша ернинг ўзидан Дубайга етиб боради. Маълумот ўрнида қайд этиш керак, Осиё чемпионати ярим финалига қадар етиб борган тўрт мамлакат терма жамоаси шу йилнинг ноябрь ойида Таиландда бўлиб ўтадиган жаҳон чемпионатига йўлланма олади.