- Даставвал, Фарғона аҳлини кириб келаётган Рамазон Ҳайит айёми билан табриклайман! Бугун қийин учрашув ўтказдик. “Нефтчи” кетма-кет мағлубиятлардан сўнг бугунги ўйинда бор кучини намойиш этишини билардик. “Бухоро” билан ўйиндан кейин шогирдларимга бу ҳақда қайта-қайта таъкидладим. “Чўкаётган одам кўпикка ҳам ёпишади”, деб бекорга айтишмаган. Тақвимга кўра, бизнинг кубок ва чемпионат доирасидаги ўйинлар оралиғи уч кунни ташкил қилди. Насиб экан, бу биз учун фойдали бўлиб чиқди. Кам сонли бўлса-да, узоқ йўл босиб келган мухлисларимизга миннатдорчилик билдираман! Футболчиларга эса, гол ўтказиб юборганимиздан сўнг бўшашишмагани учун катта раҳмат айтаман!

 

Урган голларимиз тасодиф эмас. Биз биринчи бўлимда дарвозага деярли зарба йўлламадик. Шу сабабли танаффусда йигитларга дарвозага зарба йўллаш бўйича кўрсатма бердик. Худога шукрки, ҳаммаси биз истагандек бўлди, ғалабага эришдик. Францис Нарх озгина чарчаб қолди. Унинг ўрнига ёш футболчимизни туширдик. Ўйинлар орасидаги тиғиз вақт туфайли натижадан келиб чиқиб айрим футболчиларимизга дам олишлари учун имконият яратиб бердик.