Superliganing 5-turidan o‘rin olgan “Neftchi” – “Bunyodkor” (1:3) uchrashuvidan keyin mehmonlar ustozi Shuhrat Maqsudov o‘z fikrlari bilan o‘rtoqlashdi.
- Dastavval, Farg‘ona ahlini kirib kelayotgan Ramazon Hayit ayyomi bilan tabriklayman! Bugun qiyin uchrashuv o‘tkazdik. “Neftchi” ketma-ket mag‘lubiyatlardan so‘ng bugungi o‘yinda bor kuchini namoyish etishini bilardik. “Buxoro” bilan o‘yindan keyin shogirdlarimga bu haqda qayta-qayta ta’kidladim. “Cho‘kayotgan odam ko‘pikka ham yopishadi”, deb bekorga aytishmagan. Taqvimga ko‘ra, bizning kubok va chempionat doirasidagi o‘yinlar oralig‘i uch kunni tashkil qildi. Nasib ekan, bu biz uchun foydali bo‘lib chiqdi. Kam sonli bo‘lsa-da, uzoq yo‘l bosib kelgan muxlislarimizga minnatdorchilik bildiraman! Futbolchilarga esa, gol o‘tkazib yuborganimizdan so‘ng bo‘shashishmagani uchun katta rahmat aytaman!
Urgan gollarimiz tasodif emas. Biz birinchi bo‘limda darvozaga deyarli zarba yo‘llamadik. Shu sababli tanaffusda yigitlarga darvozaga zarba yo‘llash bo‘yicha ko‘rsatma berdik. Xudoga shukrki, hammasi biz istagandek bo‘ldi, g‘alabaga erishdik. Fransis Narx ozgina charchab qoldi. Uning o‘rniga yosh futbolchimizni tushirdik. O‘yinlar orasidagi tig‘iz vaqt tufayli natijadan kelib chiqib ayrim futbolchilarimizga dam olishlari uchun imkoniyat yaratib berdik.
