«МЮ» ҳужумчиси Криштиану Роналду Англия чемпионатининг 37-тури доирасида бўлиб ўтган «Челси»га қарши ўйинда (1:1) битта гол муаллифига айланди.

Эътиборли томони, манкунианликлар томонидан урилган сўнгги 9та голнинг саккизтасига айнан 37 ёшли футболчи муаллифлик қилган. Португалиялик футболчи 12 март санасидан бошлаб ўтказилган ўйинларда —  «Тоттенхэм» (3:2) ва «Норвич» (3:2)га қарши баҳсларда хет-трикни расмийлаштирган бўлса, аввалги баҳсда «Арсенал» (1:3) дарвозасига битта гол урганди. Бу вақт оралиғида «МЮ» сафида Роналдудан ташқари фақат Фред ўз ҳисобига битта гол ёзган («Лестер» билан ўйинда — 1:1).

Криштиану АПЛнинг жорий маввсумида 27та ўйинда иштирок этиб, 17 гол муаллифига айланган.