Франциянинг «Лилль» клуби ҳужумчи Жонатан Дэвид билан трансфер ойнаси пайтида 50 миллион евро эвазига хайрлашишга тайёр, дея хабар бермоқда журналист Фабрицио Романо ўзининг твиттердаги саҳифасида.

Манбага кўра, ҳужумчига Европанинг бир қатор топ-клубларидан жиддий қизиқиш бор.

Жонатан Дэвид 2020 йилнинг 11 августидан бери «Лилль» сафида тўп тепади. Унинг клуб билан шартномаси 2025 йилнинг 30 июнига қадар мўлжалланган.

Жорий мавсумда 22 ёшли канадалик «Лилль» сафида барча мусобақаларда 43 та ўйин ўтказиб, 17 та гол уриб, клубнинг энг яхши тўпурари бўлиб турибди. Шунингдек, ҳужумчи бу йил Канада терма жамоаси сафида 18 та ўйин, 9 та гол ва 4 та голли узатмани амалга оширди.

Маълумот ўрнида, трансфермаркт портали Жонатан Дэвидни 50 миллион еврога баҳоламоқда.