“Бунёдкор” – “Олмалиқ” учрашувидан кейинги матбуот анжуманига биринчи бўлиб меҳмонлар устози ташриф буюрди.

- Ғалаба билан “Бунёдкор” аъзоларини табриклаб ўтмоқчиман. Жамоа кетма-кет ўйинлар ўтказиб, у ёқдан бу ёққа парвозлар қилаётган бўлса-да, яхши ўйин кўрсатиб келмоқда. Бугунги баҳсда битта жамоа ўйнади – “Бунёдкор”! Шогирдларимни ҳаракатларини таний олмадим. Футболчиларимиз ҳатто ўз сояларидан қўрқиб ўйнашди. Балки бизникилар кечки пайт чироқда ўйнашга кўникишмагандир.

- Бугунги баҳсда ҳимоявий тактика танладингиз. Ҳужумкор ўйнашнинг имкони йўқмиди?

- Агар очиқ футбол кўрсатганимизда “Бунёдкор” бизга бешта гол урган бўларди. Иккинчи бўлимда рақиб ўйинида бироз хотиржамлик пайдо бўлгач биз олдинга ўтдик. 

- Евгений Гоголь бугун ўзгача кўринишда – шлем кийиб ўйнади. Тинчликми?

- Унинг бошида оз-моз чайқалиш бор. Шунга у шлем кийиб ўйнашга мажбур эди.

- Яқинда “Жар” стадионида “Пахтакор” билан дуранг ўйнаган эдинглар. Бугун эса мағлубиятга учрадинглар. Айтингчи, ўшанда “Олмалиқ” кучлироқ ўйин кўрсатганмиди ёки бугун “Бунёдкор”га ростдан ҳам бас кела олмадингларми?

- “Пахтакор”га қарши яхшироқ ўйнагандик. Ўшанда Деян Журжевич ҳам бизнинг ўйинимизни эътироф этиб, марказда устунлик қилганимизни таъкидлаб ўтганди. Бугун эса майдон марказида “Бунёдкор”ни енгга олмадик. Натижада ташаббус рақиб томонига ўтиб кетди.

- Холмуродовни нега майдонга туширмадингиз?

- Истаймизми-йўқми унда тезлик бироз пастроқ. Лекин унинг иккинчи қаватдаги ўйинига қойил қоламиз. Биринчи бўлим мобайнида қанотлардан ҳеч қандай ҳужум ташкил эта олмадик. Тузук қуруқ пас беролмадик. Шу боис Холмуродовни майдонга туширишдан наф кўрмадим.

- Жамоа олдига қандай вазифа қўйилган?

- Йил бошида кучли тўртликка кириш эди. Аммо бугунгидек ўйнайдиган бўлсак мақсадимизга етиша олишимиз даргумон.